धनगढी, २ असार / कैलालीको साविक भीमदत्त राजमार्गको दायाँ–बायाँ क्षेत्राधिकार १५-१५ मिटर कायम गर्न माग गर्दै स्थानीयवासीले प्रधानमन्त्रीलाई ज्ञापनपत्र बुझाएका छन्।

स्थानीय रामासिंह भाट र नरबहादुर तामाङसहित १०१ जनाको हस्ताक्षर रहेको ज्ञापनपत्र सोमबार जिल्ला प्रशासन कार्यालय कैलालीमार्फत प्रधानमन्त्रीलाई बुझाइएको हो ।

ज्ञापनपत्रमा कैलालीबाट सुरु हुने साविक भीमदत्त राजमार्ग आगामी दिनमा मुख्य रूपमा कैलाली, डोटी तथा डडेल्धुराका केही क्षेत्रका नागरिकको आवतजावत र पर्यटकीय गन्तव्यसम्म पुग्ने मार्गका रूपमा सीमित हुने उल्लेख गरिएको छ। खुटिया–दिपायल फास्ट ट्र्याक, चिसापानी–कुइने अछाम सडक तथा महाकाली करिडोरलगायत वैकल्पिक राजमार्ग निर्माण भइरहेका कारण भीमदत्त राजमार्गमा सवारी चाप घट्ने दाबी ज्ञापनपत्रमा गरिएको छ।

सोही आधारमा राजमार्ग अन्तर्गत पर्ने गोदावरी, बुढितोला, खानीडाँडा, सहजपुर, फल्टुडे, बुडर हुँदै स्याउलेसम्मको क्षेत्रमा राजमार्गको दायाँ–बायाँ १५/१५ मिटर मात्रै कायम हुने गरी व्यवस्थापन गर्न सरकारसँग माग गरिएको छ।

ज्ञापनपत्र जिल्ला प्रशासन कार्यालय कैलालीका प्रमुख जिल्ला अधिकारी हिरालाल रेग्मीलाई बुझाइएको स्थानीय रामासिंह भाटले जानकारी दिए।

स्थानीयवासीले हाल कायम रहेको क्षेत्राधिकारका कारण सडक आसपासका बस्ती तथा जग्गाधनी प्रभावित भएको उल्लेख गर्दै स्थानीय आवश्यकता र भविष्यको सवारी चापलाई ध्यानमा राखेर उचित निर्णय गर्न सरकारसँग आग्रह गरेका छन्।