धनगढी, ३१ जेठ / विश्व रक्तदाता दिवसको अवसरमा धनगढी लेडिज जेसिजले आज धनगढीमा रक्तदान कार्यक्रमको आयोजना गरेको छ । धनगढी स्थित नेपाल रेडक्रस सोसाइटीको रक्त सञ्चार केन्द्रमा आयोजना गरिएको उक्त कार्यक्रममा नेपाल रेडक्रस सोसाइटीकै प्राविधिक सहयोग रहेको छ ।
‘रक्तदान गरौँ, जीवन बचाऔँ’ भन्ने मूल नाराका साथ आयोजना गरिएको यस कार्यक्रममा स्थानीय युवा, जेसिजका सदस्य तथा सर्वसाधारणहरूले उत्साहजनक रूपमा रक्तदान गरिरहेका छन् ।
कार्यक्रमकी संयोजक एवं धनगढी लेडिज जेसिजकी उपाध्यक्ष कोपिला कुँवरका अनुसार पछिल्लो समय अस्पतालहरूमा रगतको माग बढ्दै गएकाले आपूर्तिमा सहजता ल्याउन र आकस्मिक आवश्यकतालाई परिपूर्ति गर्ने उद्देश्यले यो कार्यक्रम आयोजना गरिएको हो ।
ूमानव जीवन रक्षाका लागि रक्तदान सबैभन्दा ठुलो दान हो । विश्व रक्तदाता दिवसको यो विशेष अवसरमा रगतको अभावका कारण कसैले पनि ज्यान गुमाउनु नपरोस् र समाजमा रक्तदान सम्बन्धी सचेतना फैलियोस् भन्ने उद्देश्यले हामीले यो कार्यक्रमको संयोजन गरेका हौँ,ू उपाध्यक्ष कुँवरले भन्नुभयो ।
कार्यक्रममा धनगढी लेडिज जेसिजका पदाधिकारीहरू, विभिन्न सामाजिक क्षेत्रका व्यक्तित्वहरू तथा सञ्चारकर्मीहरूको उल्लेखनीय उपस्थिति रहेको छ । जेसिजले सामाजिक उत्तरदायित्व अन्तर्गत आगामी दिनहरूमा पनि यस्ता रचनात्मक र मानवीय सेवाका कार्यहरूलाई निरन्तरता दिने प्रतिबद्धता जनाएको छ ।
