धनगढी, २९ चैत /   सत्यराज जोशीद्वारा अङ्ग्रेजी भाषामा लिखित पुस्तक ‘कर्मपथ’ केवल पुस्तक औपचारिक परिचर्चामा सीमित रहेन, बरु विचार, चिन्तन र कर्मबारे बहसको मञ्च बन्यो। आइतबार धनगढीस्थित जनपुस्तकालय हलमा आयोजित कार्यक्रममा पुस्तकको विषयवस्तुभन्दा बढी यसको सन्देश र दृष्टिकोणमाथि गहिरो छलफल भयो।

कैलाली बहुमुखी क्याम्पसका प्राध्यापकहरू डा.ठाकुर ढुङ्गेल र डा. सिताराम भट्टले ‘कर्मपथ’ लाई सरल प्रस्तुति, संरचनात्मक स्पष्टता र पाठकमैत्री शैलीको उदाहरणका रूपमा व्याख्या गरे। उनीहरूले पुस्तकमा प्रयोग गरिएका सहायक शीर्षक र तस्बिरले पाठकलाई ‘पढ्दै बुझ्ने’ मात्र नभई ‘हेर्दै महसुस गर्ने’ अनुभव दिने बताएका छन्।

पुस्तकको मूल सन्देश “आफ्नो कर्ममा विश्वास”लाई समिक्षकहरूले आजको समाजका लागि आवश्यक दृष्टिकोणका रूपमा प्रस्तुत गरे। भट्टले पुस्तकलाई पूर्वीय र पाश्चात्य दर्शन जोड्ने सेतुको रूपमा व्याख्या गर्दै, “समाजको समृद्धि त्यहाँका मानिसको चिन्तनसँग जोडिएको हुन्छ,” भने।

कार्यक्रममा लेखक जोशीले आफ्नो वैचारिक यात्राको मूल प्रश्न ‘किनरु’ भएको बताए। महाभारत र रामायणबाट प्रेरित हुँदै उनले कर्मलाई निरन्तर प्रक्रिया भएको र परिणामभन्दा कारणको खोजी महत्वपूर्ण हुने धारणा राखे। “किनको जवाफ भेटेपछि ‘कसरी’ आफैँ देखा पर्छ,” उनले भने।

जोशीले मलेसिया, श्रीलंका र भारत लगायत देशमा आफ्नो अनुसन्धान प्रस्तुत गरिसकेका छन्। धनगढी उपमहानगरपालिका-१२ का स्थायी बासिन्दा उनी हाल काठमाडौंमा अध्ययन, अध्यापन र अनुसन्धानमा सक्रिय छन्।