धनगढी, १३ माघ /  राष्ट्रिय स्वतन्त्र पार्टी (रास्वपा) का वरिष्ठ नेता तथा आगामी निर्वाचनका लागि झापा–५ का उम्मेदवार बालेन्द्र शाह (बालेन) को सुदूरपश्चिम भ्रमणले धनगढीमा नयाँ राजनीतिक तरङ्ग पैदा गरेको छ। चुनावी प्रचारप्रसारका क्रममा बर्दिया हुँदै मंगलबार धनगढी आइपुगेका बालेनलाई स्वागत गर्न यति ठूलो जनसागर उर्लियो कि उनी आफ्नै पार्टीको सम्पर्क कार्यालयभित्र समेत छिर्न सकेनन् ।

कैलाली क्षेत्र नम्बर ५ को चुनाव लक्षित धनगढीको सम्पर्क कार्यालयमा बालेनलाई भेट्न उम्मेदवार आनन्द बहादुर चन्दलगायतका नेताहरू भित्रै पर्खिरहेका थिए। तर, कार्यालय बाहिर समर्थकहरूको अत्याधिक भीड र ‘बालेन सरकार’ को पक्षमा लागेको नाराबाजीका कारण उनी भित्र पस्ने अवस्था नै बनेन। भीड नियन्त्रणबाहिर जान थालेपछि उनी बाहिरबाटै समर्थकहरूलाई हात हल्लाउँदै र घण्टी बजाउँदै कञ्चनपुरतर्फ लागेका छन्।

बालेन आजै कञ्चनपुरको पुनर्वास हुँदै महेन्द्रनगर पुग्ने कार्यतालिका छ। त्यहाँ उनले झलारी र महेन्द्रनगरमा आयोजित चुनावी सभाहरूलाई सम्बोधन गर्नेछन्।

काठमाडौँ महानगरपालिकाको मेयर पदबाट राजीनामा दिएर राष्ट्रव्यापी अभियानमा होमिएका बालेनले सुदूरपश्चिमका पहाडी जिल्लाहरूमा पनि चुनावी कार्यक्रममा सहभागी हुने योजना बनाएका छन्।