धनगढी, ५ माघ /  सुदूरपश्चिमको शैक्षिक क्षेत्रमा महत्वपूर्ण उपलब्धिका रूपमा हेरिएको पहिलो राष्ट्रिय सम्मेलन आजदेखि ऐश्वर्य बहुमुखी क्याम्पस धनगढीमा सुरु भएको छ। विज्ञान, प्रविधि तथा व्यवस्थापन अभ्यासमा देखिएका नवीन प्रवृत्तिहरूमा केन्द्रित रहेर आयोजना गरिएको यस सम्मेलनमा सुदूरपश्चिमसहित देशका विभिन्न विश्वविद्यालय र क्याम्पसका प्रमुख, प्राज्ञ व्यक्तित्व तथा अनुसन्धानकर्ताहरूको उल्लेखनीय उपस्थिति रहेको छ।

‘ इमर्जिङ ट्रेन्ड इन साइन्स टेक्नोलोजी एण्ड म्यानेजमेन्ट प्राक्टिस विषयवस्तुमा आधारित यो सम्मेलन (ETSTMPS- 2026) आज र भोलि (माघ ५ र ६ ) गरी दुई दिनसम्म सञ्चालन हुने क्याम्पस प्रमुख नरेश पन्तले बताए ।

उक्त सम्मेलन ऐश्वर्य बहुमुखी क्याम्पसको रिसर्च म्यानेजमेन्ट सेलद्वारा आयोजना गरिएको हो ।

क्याम्पस प्रमुख नरेश पन्तले सम्मेलन सुदूरपश्चिमको शैक्षिक विकास, अनुसन्धान संस्कृति प्रवर्द्धन तथा विश्वविद्यालयस्तरीय सहकार्य विस्तारका लागि एक कोसेढुङ्गा सावित हुने विश्वास व्यक्त  गरेका छन् । उनले सम्मेलनमा विभिन्न विषयगत सत्रहरू, अनुसन्धानपत्र प्रस्तुतिकरण तथा शैक्षिक बहसहरू हुनेछन्, जसले स्थानीयदेखि राष्ट्रिय तहसम्म ज्ञान आदान-प्रदानलाई सुदृढ बनाउने बताए।

कार्यक्रममा सहभागी प्राज्ञ व्यक्तित्वहरूले विज्ञान, प्रविधि र व्यवस्थापन क्षेत्रका समसामयिक चुनौती र सम्भावनामाथि आफ्ना विचार प्रस्तुत गर्नेछन्। आयोजकले यस सम्मेलनले सुदूरपश्चिमको उच्च शिक्षामा नयाँ ऊर्जा थप्ने अपेक्षा गरेको छ।

कार्यक्रमको उद्घाटन सत्रमा बोल्दै सुदूरपश्चिमका प्राज्ञ व्यक्तित्व प्राध्यापक ड. हेमराज पन्तले सबैभन्दा ठूलो ज्ञान प्रश्न गर्न सक्नु नै हो। हरेक नयाँ कुरा प्रश्नले नै जन्माउने भएकाले अनुसन्धानका लागि पनि प्रश्न गर्न सक्नु पहिलो मुख्य विषय रहेको औंल्याए।

कार्यक्रमको सभाध्यक्ष क्याम्पस व्यवस्थापन समिति अध्यक्ष नृप बहादु ओडले गरेका थिए भने कार्यक्रमको प्रमुख आतिथ्यता सुदूरपश्चिम विश्वविद्यालयका उपकुलपति प्राध्यापक डाक्टर हेमराज पन्तले गर्नुभएको थियो ।