धनगढी, ३ माघ / दार्चुला मालिकार्जुनमा शिवपुराण तथा धार्मिक महोत्सव-२०८२ हुने भएको छ । आज महोत्सव आयोजक समितिले धनगढीमा सरोकारवाला निकायहरूको सहभागितामा धार्मिक महोत्सवको तयारी अवस्था, व्यवस्थापन रणनीति तथा प्रचार-प्रसारका विषयमा विस्तृत छलफल गरेको हो ।

दार्चुला जिल्लाको ऐतिहासिक तथा धार्मिक महत्व बोकेको शैल्य मल्लिकार्जुन धाममा गौशाला निर्माण र अक्षयकोष स्थापना गर्ने उद्देश्यसहित आयोजना हुन लागेको उक्त महोत्सव २०८२ माघ २२ गतेदेखि फागुन ३ गतेसम्म मालिकार्जुन गाउँपालिका–३ मा सञ्चालन हुने भएको छ।

यसबारे जानकारी दिँदै श्री शैल्य मल्लिकार्जुन राष्ट्रिय धाम शिवपुराण एवं धार्मिक महोत्सव सञ्चालन समितिका सह-संयोजक तथा आर्थिक विभाग संयोजक किशन सिंह सामन्तले कार्यक्रम धार्मिक, सांस्कृतिक र सामाजिक दृष्टिले अत्यन्त महत्वपूर्ण रहेको बताए।

अन्तर्क्रिया कार्यक्रममा बोल्दै सामन्तले शिवपुराण जस्तो पवित्र धार्मिक अनुष्ठानले समाजमा धार्मिक चेतनाको विकास गर्नुका साथै दार्चुला जिल्लाको धार्मिक, सांस्कृतिक तथा पर्यटकीय पहिचान राष्ट्रियस्तरमा उजागर गर्ने विश्वास व्यक्त गरे। उनले महोत्सवलाई मर्यादित, अनुशासित र प्रभावकारी बनाउन सबै पक्षबीच आपसी समन्वय अपरिहार्य रहेकोमा जोड दिए।

कार्यक्रममा सहभागीहरूले सुरक्षा व्यवस्था, यातायात व्यवस्थापन, आवास सुविधा, स्वयंसेवक परिचालन, स्थानीय सहभागिता र प्रभावकारी प्रचार-प्रसारका विषयमा आ-आफ्ना सुझाव प्रस्तुत गरेका थिए। सहभागीहरूले महोत्सवलाई ऐतिहासिक बनाउने उद्देश्यले आफ्नो-आफ्नो क्षेत्रबाट सक्दो सहयोग गर्ने प्रतिबद्धता समेत व्यक्त गरेका छन्।

अन्तर्क्रिया कार्यक्रममा धार्मिक अगुवा, समाजसेवी, बुद्धिजीवी, सञ्चारकर्मी तथा आयोजक समितिका प्रतिनिधिहरूको उल्लेखनीय उपस्थिति रहेको थियो। आयोजक समितिले प्राप्त सुझावहरूलाई व्यवहारमा उतार्दै दार्चुलामा आयोजना हुने शिवपुराण एवं धार्मिक महोत्सव-२०८२ लाई भव्य, मर्यादित र सफल बनाइने प्रतिबद्धता जनाएको छ।