धनगढी,१८ चैत/ करिब तीन सातादेखि लगातार अवरुद्ध भइरहेको सुदूरपश्चिम प्रदेशसभाको आइतबारको बैठक पनि अवरुद्ध भएको छ । बैठक सुरु हुनेबित्तिकै विपक्षी सांसद विरोधमा उभिएपछि सभामुख भीमबहादुर भण्डारीले एकजना सांसदलाई बोल्न भनेका थिए ।

राप्रपा सांसद खेमादेवी बिष्टले भनाइ राखिन् । त्यस क्रममा उनले डेढ साताअघि सुदूरपश्चिम प्रदेशसभाका केही सांसद प्रदेशसभालाई जानकारी नै नदिई भारतको उत्तराखण्डमा आयोजित औपचारिक कार्यक्रममा सहभागी भएको र उत्तराखण्डका मुख्यमन्त्रीसँग बैठक पनि गरेको कुराप्रति आपत्ति जनाउँदै प्रदेशसभालाई लिखित जवाफ दिनुपर्ने माग गरिन् । उनले बिनाजानकारी सांसदलाई भारतका मुख्यमन्त्रीसँग बैठक गर्ने अनुमति कसले दियो रु भनी प्रश्न गरेकी थिइन् ।

अघिल्लो शुक्रबार भारतको उत्तराखण्ड प्रदेशको देहरादुनमा आयोजित इन्डो–नेपाल अन्तर्राष्ट्रिय व्यापार मेला तथा पर्यटन महोत्सवको औपचारिक कार्यक्रममा सुदूरपश्चिमका पाँच सांसद सहभागी भएका थिए । सभामुख भण्डारीका अनुसार उनीहरु कसैले पनि प्रदेशसभा सचिवालयलाई जानकारी गराएका थिएनन् ।

पूर्वमुख्यमन्त्री तथा एमाले संसदीय दलका नेता राजेन्द्रसिंह रावल, विधायन तथा प्रदेश मामिला समितिका सभापति एवं कांग्रेस सांसद दिवानसिंह बिष्ट, कांग्रेसका प्रमुख सचेतक विक्रमसिंह धामी र सांसद मधु भारती, माओवादी केन्द्रकी सांसद जानकीदेवी कुँवर र एकीकृत समाजवादीका सांसद प्रकाश रावल उक्त औपचारिक कार्यक्रममा सहभागी हुन देहरादुन गएका थिए । त्यस क्रममा पूर्वमुख्यमन्त्री रावलबाहेक चारजना सांसदले कूटनीतिक मर्यादाविपरीत उत्तराखण्डका मुख्यमन्त्री पुष्करसिंह धामीको निवासमा औपचारिक भेटघाट तथा छलफलसमेत गरेका थिए ।

सांसद बिष्टले शनिबार आर्थिक लेनदेनको आरोप लागेपछि उद्योग पर्यटन वन तथा वातावरणमन्त्री लक्ष्मणकिशोर चौधरीले मुख्यमन्त्री कमलबहादुर शाहको निर्देशनमा राजीनामा दिएको विषय उप्काउँदै उनले मुख्यमन्त्री शाहतर्फ पनि नैतिक प्रश्न उब्जिएको बताइन् । सांसद बिष्टले मन्तव्य राखिसकेपछि पनि प्रतिपक्षी सांसदले विरोध जारी राखे । उनीहरुले खर्च बढाउने विभिन्न निर्णय गरेको बारे मुख्यमन्त्रीले प्रदेशसभामा जवाफ दिनुपर्ने माग गरिरहेका छन् ।