धनगढी,११ माघ । धनगढीमा आर्थिक विकासमार्फत जोखिम व्यवस्थापन कार्यक्रम अन्तर्गत महिला नेतृत्व विकासमा आधारित दुई दिने कार्यशाला सफलतापूर्वक सम्पन्न भएको छ। एमरेड परियोजना अन्तर्गत मर्सिकोर, एमरेड र सिसिएसको आयोजनामा कार्यक्रम सम्पन्न भएको हो।

कार्यशालामा कैलाली र कञ्चनपुरका सामुदायिक विपद् व्यवस्थापन समिति र कार्यदलका ३४ जना प्रतिनिधिहरू सहभागी थिए। कार्यक्रममा मर्सिकोरका प्रतिनिधि सन्देश पनेरु, लक्ष्मी अवस्थित, संगीता अधिकारी, सिसिएसमा कार्यरत भावना भट्ट, र कार्यक्रम संयोजक मणिराज पाण्डेले महिलाहरूको नेतृत्व विकास, विपद् जोखिम न्यूनीकरण, र चुनौतीहरूबारे प्रस्तुति दिएका थिए।

कार्यशालाको मुख्य उद्देश्य महिलाहरूलाई नेतृत्व क्षमतामा सुदृढता ल्याउँदै विपद् जोखिम न्यूनीकरण तथा व्यवस्थापन प्रक्रियामा सक्रिय र आत्मविश्वासपूर्ण भूमिका खेल्न सक्षम बनाउनु थियो। साथै, उनीहरूलाई अनुभव र राम्रो अभ्यासहरू साझा गर्न अवसर प्रदान गर्दै सहकार्य र आपसी सिकाइ प्रवद्र्धन गर्नु कार्यशालाको अर्को महत्वपूर्ण पक्ष थियो।

कार्यक्रममा सहभागी महिलाहरूले यस्ता कार्यशालाले आफूहरूलाई बोल्ने र नेतृत्व गर्न सक्षम बनाएको अनुभव बाडेका थिए। उनीहरूले आफ्नो पहिचान निर्माण, आत्मविश्वासको विकास, र सामुदायिक काममा अगुवाइ गर्न प्रेरणा मिलेको बताए।

यद्यपि, घरायसी काम, परिवारको दबाब, आर्थिक स्रोतको कमी, र अन्य चुनौतीहरूसँग सामना गर्नु परेको उनीहरूले बताउका थिए। यस्ता कठिनाइहरूका बीच पनि कार्यक्रमले नेतृत्व क्षमतालाई बलियो बनाउने दिशामा महत्त्वपूर्ण योगदान पु¥याएको सहभागीहरूको भनाइ थियो।

सिसिएसका कार्यक्रम संयोजक मणिराज पाण्डेले महिलाहरूको नेतृत्व क्षमतामा निखारता ल्याउन यस्ता कार्यशाला प्रभावकारी हुने बताए। उनले भने “विपद्का समयमा समस्या समाधान गर्न महिला नेतृत्व अझ प्रभावकारी हुने विश्वास छ।”

कार्यक्रममा विपद् व्यवस्थापन, समाधानका उपायहरू, र महिला नेतृत्वको महत्वबारे व्यापक छलफल भएको थियो। सहभागीहरूले यस्ता कार्यक्रमले महिलालाई समुदायको नेतृत्व लिन सशक्त बनाउने विश्वास व्यक्त गरे।