बाजुरा, २ मंसिर । नेपाल ट्रेड युनियन काँग्रेस जिल्ला कार्यसमिति बाजुराले ‘श्रमको सम्मान गरौँ, श्रम शक्ति नै श्रमको शक्ति हो ’ भन्ने मूल नाराका साथ प्रथम जिल्ला परिषद् सम्पन्न गरेको छ।

जिल्लाको विपिस्मृति भवनमा सम्पन्न कार्यक्रममा श्रमिक अधिकार र स्थानीय उत्पादन प्रवर्द्धनलाई प्राथमिकताका साथ उठाइएको थियो। कार्यक्रममा नेपाल ट्रेड युनियन काँग्रेस बाजुराले जिल्लामा समितिहरू गठन गरी श्रमिकहरूको हकहितका लागि निरन्तर क्रियाशील रहने प्रतिबद्धता व्यक्त गरेको छ।

कार्यक्रमको अध्यक्षता ट्रेड युनियन जिल्ला अध्यक्ष चक्र ब. थापाले गरेका थिए। प्रमुख अतिथिका रूपमा सुदूरपश्चिम प्रदेश सांसद पदम ब. शाही सहभागी थिए भने विशिष्ट अतिथि नेपाली काँग्रेस जिल्ला उपसभापति पदम ब। बडुवाल रहेका थिए। कार्यक्रममा त्रिवेणी नगरपालिकाका नगर प्रमुख कर्ण ब. थापा, हिमाली गाउँपालिका अध्यक्ष गोविन्द मल्ल, खप्तड छेडेदह गाउँपालिका उपाध्यक्ष विषु देवी नाथलगायत अन्य अतिथिहरूको उपस्थिति रहेको थियो। कार्यक्रममा स्वागत मन्तव्य ट्रेड युनियन उपाध्यक्ष पदमा देवी थापाले दिएकी थिइन् भने सचिव मथुराराज पण्डितले सञ्चालन गरेका थिए।

जिल्लाका सबै पालिकामा समिति गठन गरिसकेको नेपाल ट्रेड युनियन काँग्रेस बाजुराले आगामी दिनमा आफ्नै जग्गा खरिद गरी स्थायी संरचना निर्माण गर्ने योजना अघि सारेको छ। साथै, श्रमिक अधिकार, क्षमता विकास, र स्थानीय उत्पादनको प्रवर्द्धनका लागि विभिन्न गतिविधिहरू सञ्चालन गर्ने प्रतिबद्धता जनाइएको छ। कार्यक्रमले श्रम र श्रमिकको सम्मानका लागि सबै क्षेत्रबाट सहकार्य आवश्यक रहेको सन्देश दिएको छ।