धनगढी,३१ असार । नवनियुक्त प्रधानमन्त्री केपी शर्मा ओली नेतृत्वको सरकारमा सुदूरपश्चिमबाट ४ जना मन्त्री हुँदा आरजु राणा देउवा र बन्द्री पाण्डेले पहिलो पटक मन्त्री बन्ने मौका पाएका छन् । उनीहरू सँगै रमेश लेखक र दामोदर भण्डारी सुदूरपश्चिमबाट मन्त्री बने पनि दुवै जना यसअघि पटक पटक मन्त्री भइसकेका छन् । नयाँ अनुहारको रूपमा ओली नेतृत्वको सरकारमा भित्रिएका आरजु र बन्द्रीका लागि अवसर सँगै चुनौती पनि छन् ।

आरजु पहिलो पटक मन्त्री हुँदै शक्तिशाली मन्त्रालय पनि सम्हाल पुगेकी छिन । पाँच पटक प्रधानमन्त्री भइसकेका शेरबहादुर देउवा पत्नी आरजु समानुपातिक सांसद हुन । उनी यसअघि २०७४ सालको निर्वाचनमा भने कैलाली क्षेत्र नम्बर ४ बाट चुनाव लडे पनि एमालेका नारद मुनी रानासँग पराजित भएकी थिइन । काठमाण्डौंमा बस्दै आएकी आरजुले सोही समयमा उनले धनगढीमा घर समेत किनेकी थिइन । पटक पटक सांसद बने पनि मन्त्री बन्न नसकेकी आरजु हाल संसदको कृषि समितिको सभापति समेत रहेकी छिन ।

पहिलो पटक नै मन्त्री बनेका पाण्डे बाजुरा प्रतिनिधि सभा सदस्यमा एमालेका कर्णबहादुर थापालाई ५४४१ मतान्तरले हराउँदै २०७९ सालको निर्वाचनमा सांसद बनेका थिए । उनले ओली नेतृत्वको सरकारमा पर्यटन मन्त्रालयको जिम्मेवारी सम्हालेका छन् ।