धनगढी, १२ पुस/कञ्चनपुरको झलारीका पत्रकार अर्जुनबहादुर सिंहले जन्मदिनको अवसरमा शुक्लाफाँटा नगरपालिकाभित्रका बर्थिङ सेन्टरमा सहयोग गरेका छन् ।स्थानीय पत्रिका सेतीकाली एक्सप्रेसका प्रकाशक तथा रेडियो प्रभू एफएमका स्टेसन म्यानेजर अर्जुनबहादुर सिंहले आफ्नो ४०औं जन्मदिनको अवसरमा सहयोग गरेका हुन् ।

शुक्लाफाँटा नगरपालिका–१, ४, ७ र १० मा रहेका स्वास्थ्य चौकीहरूमा सञ्चालमा रहेका बर्थिङ सेन्टरका लागि पानी तताउने इलेक्ट्रोनिक जग र हट ब्याग नगरका स्वास्थ्य शाखा प्रमुख प्रमानन्द भट्टलाई हस्तान्तरण गरेको उनले बताएका छन् ।

जन्मदिनको अवसरमा फजुल खर्च गर्नुभन्दा सुत्केरी महिलालाई चिसोको समयमा तातोपानी चाहिएको बेला आफन्तहरूले स्वास्थ्य चौकीबाट होटल धाएर तातोपानी ल्याउनुपर्ने समस्या केही हदसम्म न्यूनीकरण गर्न इलेक्ट्रानिक जग दिएको उनले बताए । उनले भने, ‘सुत्केरी महिलासँगै रातिको समयमा कार्यरत स्वास्थ्यकर्मीका लागि हातखुट्टा न्यानो राख्न हट ब्यागले सहयोग गर्दछ ।’