धनगढी, २ मंसिर/सुदूरपश्चिमका मतदातालाई निर्धक्क भएर मतदानमा सहभागी हुन नेपाली सेनाले आह्वान गरेको छ। नेपाली सेनाको सुदूरपश्चिम पृतना हेडक्वार्टरका पृतनापति उपरथी विजय थापाले शुक्रबार आयोजना गरेको पत्रकार भेटभाटका क्रममा यस्तो बताएका हुन्।

‘यसपालीको चुनावमा नेपाली सेना सहितका चारवटै सुरक्षा निकाय परिचालन भएका छन्। नेपाली सेना हरेक नेपालीको सुरक्षाको जिम्मा लिने प्रमुख सुरक्षा निकाय भएकाले, चुनावमा निर्धक्क भएर मतदान गर्न आग्रह गर्दछु’ उनले भने।

‘सुदूरपश्चिमका नौवटै जिल्लामा ३० वटा कम्पनी अपरेडिङ बेस, प्लाटुन अपरेटिङ बेस र सेक्सन अपरेटिङ बेसहरू खडा गरी परिचालन गरिएका छन्। जिल्ला सुरक्षा समितिसँग समुन्वय भएर सुरक्षा योजना बनाइएको छ। २५० भन्दा बढी स्थानहरूमा ससाना टुकडीहरू खटिएर जनतालाई भयरहित रूपमा मताधिकार प्रयोग गर्नका लागि नेपाली सेना तयारी अवस्थामा छ। सुरक्षाको हिसाबले सबै मतदाताहरूलाई भयरहित रूपमा मतदानका लागि आग्रह गर्दछु’ पृतनापति थापाले भने।

मंसिर ४ गतेको आम निर्वाचनका लागि सरकारले चारवटै तहको सुरक्षा निकाय परिचालन गरेको छ। नेपाली सेना, सशस्त्र प्रहरी, नेपाल प्रहरी र अनुसन्धान विभाग गरी चारवटै सुरक्षा अंगहरू चुनावमा परिचालन गरिएका छन्।