कञ्चनपुर, २३ असोज । सत्तारुढ गठबन्धनबाट बाहिरिएको नेकपा एकीकृत समाजवादीले कञ्चनपुरमा सत्तारुढ दलहरुसंग मित्रवत् प्रतिस्पर्धा गर्ने भएको छ।तीन संघीय र ६ वटा प्रदेश निर्वाचन क्षेत्रमध्ये एउटा पनि सीट नपाएपछि सत्तारुढ गठबन्धनबाट एकीकृत समाजवादी बाहिरिएको छ।

गठबन्धनमा दाबी रहेको प्रदेश सभा निर्वाचन क्षेत्र नम्बर २(ख) र ३(क)मा एकीकृत समाजवादी एक्लै चुनावमा होमिने भएको छ।

सत्तारुढ गठबन्धनमा एकीकृत समाजवादीबाट टिकट नपाएपछि सुदूरपश्चिम प्रदेशका आर्थिक मामिलामन्त्री प्रकाश रावल र पूर्व सामाजिक विकासमन्त्री लालबहादुर खड्का गठबन्धन विरुद्ध बागी उम्मेदवार बन्ने भएका छन्।

रावल क्षेत्र नम्बर ३(क) र खड्का क्षेत्र नम्बर २(ख) मा चुनाव लड्ने तयारीमा छन्। ‘गठबन्धनबाट कञ्चनपुरमा एउटा सीट पाएनौँ, हाम्रो दाबी रहेको क्षेत्रमा उम्मेदवारी दिन्छौँ,’ आर्थिक मामिलामन्त्री रावलले भने, ‘कांग्रेस र माओवादीसंग मित्रवत् प्रतिस्पर्धा हुन्छ ।’

सत्तारुढ गठबन्धनमा एकीकृत समाजवादीले ३(क) र ३(ख) मा अन्तिमसम्म दाबी गरेको थियो। प्रदेश सभा ३(क) मा सत्तारुढ गठबन्धनबाट माओवादीका संविधानसभा सदस्य टेकेन्द्रप्रसाद भट्ट र २९ख० मा कांग्रेसका नेता समेत रहेका संविधान सभा सदस्य बहादुरसिंह थापाले टिकट पाएका छन्।