काठमाडौं, ५ फाल्गुन । बरिष्ठ फिल्म निर्देशक रेशराज आचार्यको हृदयघातले निधन भएको छ । उपचारको क्रममा राजधानीको ओम अस्पतालमा बुधबार बेलुका आठ बजे उनले निधन भएको चलचित्र निर्देशक समाजले जनाएको छ ।

एकवर्षदेखि बिरामी रहेका आचार्यको स्वास्थ्यमा अकस्मात समस्या भएपछि ओम अस्पताल लगिएको थियो । बिहीबार बिहान पशुपति आर्यघाटनमा उनको अन्तिम दाहसंस्कार गरिएको छ ।

सन् २०४४ मा रिलिज भएको फिल्म ‘तिलहरि’बाट निर्देशन यात्रा थालेका आचार्यको अन्तिम फिल्म गोपिकृष्ण मूभिजको ‘प्रीतिको फूल’ बन्यो । यो फिल्ममा राजवल्लभ कोइराला, गरिमा पन्त र युना उप्रेतीले अभिनय गरेका छन् ।

फिल्मअघि आचार्यले नेपाल टेलिभिजनको लागि ‘स्मृति’ नामक टेलिसिरियल निर्देशन समेत गरेका थिए । बाल्यकालदेखि नै उनका साथी रहेका गोपिकृष्ण मूभिजका प्रदीप दाहालले निर्देशक आचार्यलाई असल मानिस भएको बताए ।

उनका एक श्रीमती र एक छोरा फ्रान्समा बसोबास गर्दै आएका छन् । आचार्यको निधनमा निर्देशक समाजले १३ औं दिन कार्यक्रम आयोजना गर्ने महासचिव जनकदीप पराजुलीले जनाए ।