धनगढी, ८ पुस । नेकपा एमाले सुदूरपश्चिम प्रदेश कमिटिको बैठक शुरु भएको छ । एमालेका सचिव तथा सुदूरपश्चिम इन्चार्ज लेखराज भट्टको प्रमुख आथित्वमा बसेको बैठकमा विभिन्न एजेण्डामाथि छलफल भइरहेको छ ।

बैठकमा पार्टीको जिल्ला, पालिका तथा वडा कमिटिहरुको सांगठनिक अवस्था, जिल्लाहरुको राजनीतिक अवस्था, पार्टीका चुनौती र पार्टीलाई अगामी दिनमा कसरी चलायमान बनाउने विषयमा छलफल भइरहेको एमालेका प्रदेश अध्यक्ष दामोदर भण्डारीले बताए ।

उनका अनुसार बैठकले अधिवेशन गर्न बाँकी रहेका पालिका, जिल्ला अधिवेशन, प्रदेश अधिवेशन, जनसंगठनका प्रदेश सम्मेलन, पार्टी प्रवेश अभियान, पार्टीको संसदीय दल र प्रदेश सरकार लगायतका समसामयिक विषयमा पनि छलफल भइरहेको छ ।

भण्डारी अध्यक्ष भएपछि पहिलो पटक उनको अध्यक्षतामा प्रदेश कमिटिको बैठक बसिरहेको हो । बैठकमा पार्टीका स्थायी कमिटि सदस्य तथा सुदूरपश्चिम सहइन्चार्ज कर्णबहादुर थापा, पोलिट ब्युरो सदस्य गणेश ठगुन्ना, राजेन्द्र रावल, लिला भण्डारी, कैलाली जिल्ला इन्चार्ज नारदमुनी राना लगायतको उपस्थिती रहेको छ ।

बैठक शुक्रबारसम्म चल्ने बताइएको छ । बैठक शुरु हुनुभन्दा अगाडि प्रदेश कमिटिका नवनिर्वाचित अध्यक्ष, सचिव लगायतका पदाधिकारी तथा सदस्यहरुलाई पार्टीका इन्चार्ज भट्टले पद तथा गोपनियताको सपथ ग्रहण गराएका थिए ।