काठमाडौँ, १२ असोज । ल्यान्डिङ गियरमा समस्या देखिएपछि सोमबार विराटनगर अवतरण नगरी काठमाडौं फर्केको बुद्ध एयरले एटीआर ‘अल्फा नोभेम्बर इन्डिया’ जहाज प्राविधिकहरुले जाँचेपछि उडाउन सुरु गरेको छ ।
बुद्धका सिनियर क्वालिटी एसुरेन्स इन्जिनियर उपेन्द्रलाल श्रेष्ठका अनुसार उडानका क्रममा ल्यान्डिङ गियरको प्राइमरी इन्डिकेटरुमा समस्या देखिए पनि इन्जिनियरहरुले जाँच गर्दा कुनै त्रुटि भेटेनन् ।
उनले भने, “हामीले सोमबार समस्या देखिएको भनिएको जहाजको पूरै परीक्षण गर्यौं । तर केही खराबी नदेखिएपछि ह्यांगरबाट उडानमा फर्कायौं ।”
उनले अगाडि भने, “हामीले जहाजलाई ह्यांगरमा ज्याक राखेर उठायौं अनि १०/१२ पटक अन एयरमा जस्तै ल्यान्डिङ गियर (पाङग्रा) झार्यौं । बन्द गरी हेर्यौं । केही समस्या देखिएन । नर्मल नै देखियो ।”
इन्जिनियरले जहाज ठीक भएको रिपोर्टिङ नियमनकारी संस्था हवाई सुरक्षा विभागलाई गरेपछि उक्त जहाजलाई उडानका लागि अनुमति दिइएको विभागका एक अधिकारीले बताए ।
पाइलटले भनिरहे– ‘मेरो जहाजको चक्का हेरिदेऊ’
मंगलबार बिहान साढे १० बजेसम्म उक्त एटीआरले काठमाडौं-सिमरा दुईपटक उडान गरी काठमाडौंबाट पोखरातर्फ लागिसकेको थियो । बुद्धले मंगलबार त्यो जहाजबाट नेपालगञ्ज, पोखरा, जनकपुर र भैरहवा गरी ७ वटा उडान तालिका बनाएको छ ।
सोमबारको विराटनगरको उडानमा संलग्न क्याप्टेन आङ गेलु शेर्पा, को-पाइलट अमन अन्सारी र दुई जना एयरहोस्टेसलाई ‘डियुटी अफ’ मा राखिएको छ ।
यसैबीच सोमबार पोखरातर्फ उडेको बुद्धको ‘अल्फा जुलियट अक्सर’ एटीआर पनि उडानमा फर्काइएको छ । उक्त विमानमा कार्गो राखिने कम्पार्टमेन्टमा धुँवा देखिएको संकेत ककपिटमा देखिएको थियो ।
तर इन्जिनियरहरुले जाँच्दा केही समस्या देखिएको श्रेष्ठले बताए । ‘त्यो जहाजको स्मोक डिटेक्टर फल्ट देखाउने कम्पोनेन्ट नै फेर्यौं,’ इन्जिनियर श्रेष्ठले भने, ‘त्यहो जहाजमा मा पनि अहिले कुनै समस्या छैन । नर्मल उडान गरिरहेको छ ।’
