धनगढी, १६ भदौ । धनगढीको सीपी अस्पतालले ६ महिनामा साढे चार सय जना विरामीलाई युरो सम्बन्धी सेवा दिएको छ । धनगढीको सिपि अस्पतालले मृगौला तथा मुत्ररोग सम्बन्धी विभाग विस्तार गरेपछि ६ महिनाको अवधिमा चार सय ५६ जना विरामीहरुलाई सेवा दिईएको हो ।
धनगढी उपमहानगरपालिका ४ चटकपुर स्थित सिपि अस्पतालले सेवाहरु विस्तार गर्ने क्रममा पुर्णकालिन रुपमा मृगौला तथा मुत्ररोग सम्बन्धी विभाग विस्तार गरेपछि दुई सय २४ जनाको जटिल शल्यक्रिया गरिएको छ ।
दुई सय ३२ जनाको सामान्य शल्यक्रिया गरिएको अस्पतालले जनाएको छ । सेवा लिनेमा दुई सय ६६ पुरुष र एक सय ९० जना महिला रहेका छन् ।
पुर्णकालीन रुपमा मृगौला तथा मुत्ररोग सम्बन्धी विभाग विस्तार भएपछि धेरै विरामीहरुहरु लाभान्वित भएको अस्पतालका प्रशासनिक निर्देशक विकास मौनीले बताए ।
सेवाको विस्तार भएपछि मृगौला तथा मुत्ररोग सम्बन्धित समस्याबाट ग्रसित विरामीहरुले सिपी अस्पतालको एउटै छानामुनि सम्पुर्ण सेवाहरु प्राप्त गरिरहेका छन् । वरिष्ठ मुत्र तथा मृगौला रोग विशेषज्ञ डाक्टर सुमित कर्णले आवासीय रुपमा अस्पतालमा यो सेवा दिदैं आएका छन् ।
गत चैत १९ गतेदेखि अस्पतालमा मृगौला तथा मुत्ररोग सम्बन्धी सेवा सुरु भएको थियो । हाल अस्पतालमा ३ तीन वटै विधिबाट अप्रेशन भईरहेको अस्पतालका प्रशासन प्रमुख हेमराज जोशीले जानकारी दिए ।
यो सेवा सुचारु भएपछि मृगौला, मुत्रनली, मुत्रथैलीको पत्थरी, प्रोस्टेट सम्बन्धी समस्या भएका विरामीहरुले नियमित रुपमा २४ सै घण्टा धनगढीमै सेवा पाईरहेका छन् ।
सिपि अस्पतालमा स्त्री तथा प्रसुति रोग, जनरल सर्जरी, युरो सर्जरी, जनरल मेडिसिन, अर्थोपेडिक, गाईने, रेडियोलोजी र फिजियोथेरापी सेवाहरु दैनिक संचालनमा रहेको प्रशासन प्रमुख जोशीले बताए ।
आगामी दिनहरुमा पनि अस्पतालले थप अत्याधुनिक सुविधा सहित नयां विभागहरु विस्तार गर्ने योजनामा रहेको जोशीले जानकारी दिए ।
