धनगढी: कैलालीमा निर्माण सामग्री ढुवानी गर्ने सवारी साधन संचालनको समय सीमा हटाईएको छ । यसअघि निर्माण सामग्री ढुवानी गर्ने सवारी साधन राती ८ बजे देखि बिहान ५ बजे सम्म संचालन गर्न पाउने मापदण्ड तोकिएको भएपनि त्यसमा हेरफेर गरिएको हो ।

आईतबार जिल्ला प्रशासन कार्यालय कैलालीले एक आदेश जारी गर्दै आजदेखि लागु हुने गरी नचलाई नहुने निर्माण ढुवानी सवारी साधन कुनै पनि समय चलाउन पाउने व्यवस्था गरेको छ ।

प्रमुख जिल्ला अधिकारी खगेन्द्र प्रसाद रीजालद्धारा जारी आदेशमा जेठ १२ गतेको आदेशमा निर्माण सामग्रीका लागि प्रयोग हुने सवारी साधनहरु राती मात्रै संचालन गर्न पाईने भनेपनि अहिले आर्थिक बर्षको अन्तिम समय भएको र कतिपय ठाउँमा तटबन्ध लगायतका विकास निर्माणका काम गर्नुपर्ने भएकाले उक्त आदेश संसोधन गरिएको उल्लेख छ ।

नयाँ आदेशमा निर्माण व्यवसायीलाई जनस्वास्थ्य र सुरक्षाका मापदण्डहरु अनिवार्य रुपमा पालना गर्न भनिएको छ ।