धनगढी, १८फागुन। बोलन्या थलीले कैलाली जिल्ला कारागारमा पढन्या थली निःशुल्क पुस्तकालय स्थापना गरेको छ।
चेतनशील समाज, बैचारिक प्रहार र तर्कपूर्ण अभिव्यक्ति आधुनिक नेपाली समाजको आवश्यकता रहेको भन्दै प्रदेशका ९ वटै जिल्ला कारागारमा पुस्तकालय स्थापना गर्ने योजना अनुरुप मंगलबार कैलाली जिल्ला कारागारबाट अभियान शुरु गरेको बोलन्या थलीका संयोजक यादव जोशीले बताए।
बोलन्या थलीका तर्फबाट संयोजक यादव जोशी, आदित्य जोशी, अजय पाण्डे र देवराज अवस्थी लगायतको युनिटले कारागार प्रशासनका निमित्त प्रमुख बिरेन्द्र बोहरा, शुनैना श्रेष्ठ, टेक किमाडी, मनोज बोहराको रहोबरमा कैदीतर्फका चौकीदार पर्शु रानालाई पुस्तक हस्तान्तरण गरेका थिए।
बोलन्या थली पश्चिम सेती निर्माणको लागी संघर्ष गर्दै आइरहेको मञ्च हो। थलीले हालसम्म माइतीघर मण्डलामा कचौरा जुलुस, सुदूरपश्चिमबाट सङ्घीय संसदमा प्रतिनिधित्व गर्ने १३ जना सांसदसँग छलफल, सङ्गीत सङ्घर्ष कार्यक्रम गरिसकेको छ।
त्यसैगरी सरकारको खोजीको लागि भन्दै डोटीमा दिउँसै टुकी बालेर प्रदर्शन तथा ‘डोटीका सपनाका ७५० डोका’ आन्दोलन पनि गरिएको थियो।
यस्तै ‘पश्चिम सेतीका लागि सुदूरपश्चिम दौडिन्छ’ नाराका साथ २०७८ वैशाख १ गते काठमाडौँमा म्याराथन आयोजन गरिने थलीका संयोजक यादव जोशीले जानकारी दिए।
