धनगढी, माघ २४/सत्तारुढ नेपाल कम्युनिस्ट पार्टी नेकपा विभाजित भएर आधिकारिकता र सूर्य चुनाव चिह्नको विवाद निर्वाचन आयोगमा विचाराधीन छ ।
प्रधानमन्त्री केपी शर्मा ओली र पुष्पकमल दाहाल ‘प्रचण्ड’–माधव नेपाल समूहले सूर्य चिह्नसहित छुट्टाछुट्टै प्रदर्शन र भेला गरिरहेका छन् ।
प्रदर्शन, र्याली र सभा सकिनेवित्तिकै काठमाडौंका सडकमा सूर्य चुनाव चिह्न सहितको झण्डा जथाभावी फाल्ने गरिएको छ । यसरी फालिएका झण्डाले फोहोर हुने गर्छ । काठमाडौं सरसफाइ अभियान सञ्चालन गरिरहेका अभियान्ता केपी खनाल नेतृत्वको टोलीले शनिवार माइतीघर मण्डलामा फोहोर संकलन गरिरहँदा सूर्य चिन्ह अंकित झण्डा फोहोरमा भेटियो । उनले तत्कालै फेसबूक लाइभमा आएर आग्रह गरे, ‘सूर्य चुनाव चिह्न कसको हो ? माइतीघरको फोहोरमा भेटियो, लैजानुहोस् ’
राजनीतिक आस्था जोडिएको, पार्टीको चुनाव चिह्न अंकित झण्डा फोहोरको डंगुरसँगै फाल्न मनले नमानेपछि अभियान्ता खनालले झण्डा सकुशल लैजान आग्रह गर्दै फेसबूक लाइभ गरे । तर झण्डा लैजान कोही आएनन् ।
फोहोरमा भेटिएको झण्डा के गर्ने भनेर अभियान्ताबीच छलफल हुँदा सम्बन्धित पार्टी कार्यालयमा बुझाउने समझदारी बन्यो । त्यसपछि केपी खनाल सहितको टोलीले नेकपाका पार्टी कार्यालय पेरिसडाँडा र धुम्बाराही पुगेर झण्डा बुझाएको छ ।
भीड बढाउन राजनीतिक आस्था विनाका मान्छेलाई प्रदर्शनमा सहभागी गराउँदा झण्डालाई जथाभावी फालेर फोहोर गर्ने गरिएको अभियान्ता खनालको तर्क छ । ‘राजनीतिक आस्थामा कटिवद्ध व्यक्तिले यसरी झण्डालाई जथाभावी फाल्दैन,’ उनले भने, ‘आगामी दिनमा हुने प्रदर्शन र र्यालीमा आफ्ना झण्डा सुरक्षित राख्न आग्रह गर्दछु ।’
कैलालीको लम्कीचुहाका स्थायी वासिन्दा खनाल केही हप्तायता काठमाडौंमा आएर सरसफाई अभियान सञ्चालन गरिरहेका छन् । खनालले अघिल्ला शनिवार समेत सरसफाई कार्यक्रम गरेका थिए । माइतीघर मण्डला क्षेत्रमा भएको सरसफाई कार्यक्रममा कमेडियन हिमेश पन्तको प्रमुख उपस्थिति रहेको थियो ।
