धनगढी, २२ पुस/ संसद बिघटनपछि पहिलो पटक उपत्यका बाहिरका जनतालाई सम्बोधन गर्न सुदूरपश्चिम आउदै गरेका प्रधानमन्त्री केपी शर्मा ओलीको आमसभाको सुरक्षाका लागि व्यापक सुरक्षा तयारी गरिएको छ ।

नेकपाद्धारा पुष २४ गते धनगढीमा आयोजना गर्न लागिएको आमसभालाई सम्बोधन गर्न प्रधानमन्त्री तथा पार्टी अध्यक्ष ओली आउदैछन् । संसद बिघटन र नेकपा बिभाजनपछि नेकपाद्धारा आयोजित यो पहिलो आमसभा हो ।

उच्च सुरक्षा स्रोतका अनुसार प्रधानमन्त्री ओली तथा आमसभाको सुरक्षाका लागि पुष २४ गते करीव एक हजारको हाराहारीमा सशस्त्र प्रहरी र प्रहरी परिचालन गरिनेछन । झण्डै सयको हाराहारीमा सादा पोशाकमा प्रहरी खटिनेछन् ।
जिल्ला सुरक्षा समिति कैलालीले आज प्रधानमन्त्रीको सुरक्षा तथा आमसभा स्थलमा अप्रिय घट्ना हुन नदिन रणनीति बनाउदै छ ।

कैलालीका प्रमुख जिल्ला अधिकारी यज्ञराज बोहराले प्रधानमन्त्री ओलीको सुरक्षाका लागि व्यापक सुरक्षा तयारी गरिएको र थप आवश्यक रणनीति बनाउन आज सुरक्षा समितिको बैठक बस्ने बताए ।

आमसभा स्थल वरीपरी तथा प्रधानमन्त्री ओली आवात जावत गर्ने सडकमा कुनै पनि किसिमको बिरोध तथा अबरोध गर्न नदिन सुरक्षा निकाय हाई अलर्ट गरिएको उच्च सुरक्षाअधिकारीले बताए ।

स्रोतका अनुसार आमसभा स्थल तथा प्रधानमन्त्री आवात जावत गर्ने सडक क्षेत्रमा कालो व्यानर, कालो मास्क र कालोझण्डामा प्रतिबन्ध लगाइनेछ ।

नेकपा बिभाजनपनि पहिलो पटक उपत्यका बाहिर प्रधानमन्त्री ओलीले आयोजन गर्न लागेको आमसभामा नेकपा प्रचण्ड–नेपाल समूहले बिरोध तथा अबरोध गर्ने जानकारी पाएपछि सुरक्षा निकाय हाई अलर्ट भएको स्रोतले बताएको छ ।