धनगढी, ३१ साउन/बझाङमा स्क्रब टाइफसबाट एक जनाको मृत्यु भएको छ। दुर्गाथली गाउँपालिकाकी २२ वर्षीया पत्रिका चिमाडीको बिहीबार उपचारका क्रममा जिल्ला अस्पतालमा मृत्यु भएको हो।

अस्पतालमा उपचाररत एक अर्की १७ वर्षीया किशोरीको अवस्था भने चिन्ताजनक रहेको छ। हालसम्म बझाङमा ९ जनामा संक्रमण देखिएको छ। अस्पतालका अनुसार थलारा गाउँपालिकामा ३, मष्टा गाउँपालिका र जयपृथ्वी नगरपालिकामा २–२ जनामा संक्रमण देखिएको छ। खप्तड छान्ना, दुर्गाथली गाउँपालिकामा एक–एक जनामा संक्रमण देखिएको अस्पतालले जनाएको छ।

अस्पतालले संक्रमण फैलिएको बारे प्रदेश स्वास्थ्य निर्देशनालयमा जानकारी गराएर परीक्षणका लागि किट र औषधीको माग गरेको जनाएको छ। मुसा तथा गाईवस्तुको शरिरमा रहने रिकेन्सीया नामको किर्नाले टोकेपछि स्क्रब टाइफस लाग्ने गर्छ। यो रोगको संक्रमण वर्षातमा बढी हुने स्वास्थ्यकर्मीहरु बताउछन। सुरुमा ज्वरो आउने, टाउको दुख्ने, वान्ता हुने लक्षणहरु देखिन्छन् ।