धनगढी, २५ साउन/बैतडीकी एक गर्भवतीमा कोरोना पुष्टि भएको छ । पाटन नगरपालिका ३ की १९ वर्षीय महिलामा आइतबार कोरोना पुष्टि भएको स्वास्थ्य कार्यालय बैतडीका कोभिड १९ सम्पर्क व्यक्ति भुवनप्रसाद जोशीले जानकारी दिए ।

उपचारका लागि डडेल्धुरा अस्पताल पुगेकी ती महिलाको यही साउन २३ गते स्वाब संकलन गरिएकोमा आइतबार कोरोना पुष्टि भएको उनले बताए ।
स्क्रब टाइफस भएपछि ती महिलालाई अस्पताल पुर्‍याइएको र उनमा कोरोना समेत पुष्टि भएको पाटन नगरपालिकाका स्वास्थ्य शाखा प्रमुख मदनसिंह महराले जानकारी दिए । ती महिलाको मायामेट्रो अस्पताल धनगढीमा उपचार भइरहेको भएपनि कोरोना पुष्टी भएपछी सेती प्रादेशीक अस्पतालको आइशोलेशनमा भर्ना गरिएको मायामेट्रो अस्पतालका डा. मोहन साउँद जानकारी दिए । मायामेट्रो अस्पतालका उपचारमा संलग्न ६ जना स्वास्थ्यकर्मी पनि आइशोलेशनमा बसेका छन् ।

कुनै ट्राभल हिस्ट्री नभएकी महिलामा कोरोना पुष्टि भएपछि समुदायमा संक्रमण फैलिएको आशंका गरिएको छ । संक्रमित महिलाका श्रीमानसहित उनको परिवारका सदस्यको स्वाब संकलन गरिने स्वास्थ्य शाखा प्रमुख महराले जानकारी दिए ।

उनले भने, ती महिला घरबाट कतै बाहिर गएको भन्ने जानकारी छैन । कोरोना पुष्टि भएपछि समुदायमा संक्रमण फैलिएको आशंका गरिएको छ। ती महिलालाई स्ट्रेचरमा बोकेर सडकसम्म पुर्‍याउने स्थानीय १५ जनालाई पनि अलगै होम क्वारेन्टाइनमा ७ दिन बस्न आग्रह गरिएको छ भने उनीहरुको पनि ७ दिन पछि स्वाब संकलन गरिने महराले जानकारी दिए ।

थप एकजनामा कोरोना पुष्टि भएसँगै बैतडीमा कोरोना संक्रमितको संख्या ३२१ पुगेको छ । ३२१ मध्ये सुर्नया गाउँपालिकाका १२ जना र मेलौलीका १ जना मात्रै आइसोलेसनमा छन् ।

संक्रमण पुष्टि भएका ३०७ जना भने डिस्चार्ज भइसकेका छन् । जिल्लामा सबैभन्दा बढी पञ्चेश्वर गाउँपालिकामा ६० जना संक्रमित रहेका छन् । यस्तै शिवनाथ गाउँपालिकाका ५०, दोगडाकेदार गाउँपालिकाका ४३, सिगास गाउँपालिकाका ४०, दशरथचन्द नगरपालिकाका ३४, मेलौली नगरपालिकाका २८, सुर्नया गाउँपालिकाका २६, पाटन नगरपालिकाका २४, पुर्चौंडी नगरपालिकाका ९ र डिलाशैनी गाउँपालिकाका ७ जनामा संक्रमण पुष्टी भएको छ ।