डडेल्धुरा। डडेल्धुराको आलिताल गाउँपालिका–६ मा ८ वर्षीय बालकको हत्या गरेको घटनामा जिल्ला अदालतले १० जनालाई पुर्पक्षका लागि थुनामा राख्न आदेश दिएको छ। जिल्ला अदालतका न्यायाधिश हरिप्रसाद शर्मा उपाध्यायको एकल इजलासले उनीहरुलाई थुनामा राख्न आदेश दिएको हो।सरकारी पक्षबाट थुनछेक बहस प्रकाश भण्डारीले गरेका थिए भने प्रतिवादीका तर्फबाट बहस अधिवक्ताद्वय विष्णु भट्ट र हरिप्रसाद भट्टले गरेका थिए। पक्राउ परेका १३ जनामध्ये ३ नाबालकलाई भने आवश्यक परेको बेला उपस्थिति हुने गरी उनीहरुको अभिभावकको जिम्मा लगाएको छ।

बालक हत्याको आरोपमा ५५ वर्षीय निरबहादुर ओली, ३३ वर्षीय हरिकृष्ण भाट, ४८ वर्षीया पम्फा ओली, २९ वर्षीया अमृता ओली, ४८ वर्षीय कलु खड्का, ३० वर्षीया रिमा ओली, ३१ वर्षीया पवित्रा ओली, ३० वर्षीय टीकाराम ओली र अन्य दुई जनालाई थुनामा राखिएको प्रहरी नायव उपरीक्षक दधिराम न्यौपानेले जानकारी दिए।आलिताल गाउँपालिका–६ मा खानेपानीको विषयमा विवाद हुँदा झपडका क्रममा गत असार २६ गते ८ वर्षीय बालक हिमांशु महरा गम्भिर घाइते भएका थिए। उनको उपचारका क्रममा असार २७ गते कैलालीको धनगढीस्थित अस्पतालमा मृत्यु भएको थियो।

भौना गाउँ र मेलखाली गाउँका बासिन्दाबीच बिबाद भएको थियो। दुवै गाउँका बासिन्दाबीच २०४१ सालदेखि खानेपानीको विवाद छ। मेलखाली गाउँका बासिन्दाले खानेपानी आफ्नो गाउँ लैजान खोजेको भन्दै भौना गाउँका बासिन्दाले बिरोध गर्दै आएका छन्। आफुहरुले प्रयोग गर्दै आएको खानेपानी लिफ्टिङ गरी मेलखालीमा लैजान लागेकाले विरोध गरेको मृतक बालकका बुबा गणेशबहादुर महराले आरोप लगाए। आक्रमणबाट मृतक बालकका बुबा आमा घाइते भएका थिए।