धनगढी, १४ साउन/सोमबार बिहान स्कुटीमा सवार २६ वर्षीय सन्तोशी बोहोराको ट्रकको ठक्करबाट मृत्यु भयो । र्मिमिरे लघुवित्त वित्तिय संस्थामा कार्यरत उनिलाई कार्यालय नजिक कैलालीको सडकपुर वौनियामा ट्रकले ठक्कर दिएको थियो । सडक दुर्घटनामा कैलालीमा वर्षेनी करिब छ दर्जनले अकालमा ज्यान गुमाइ रहेका छन् । त्यस क्षेत्रमा यस आ.व ७७/७८ को दोस्रो सडक दुर्घटना हो ।

जिल्ला ट्राफिक कार्यालय कैलालीका अनुसार आर्थिक बर्ष ७६ ७७ मा जिल्लामा १ सय ४६ सडक दुर्घटनामा ६९ जनाले गुमाए । आर्थिक बर्ष ७५/७६ मा ७० जनाले सडक दुर्घटनामा ज्यान गुमाएका थिए । कार्यालयका प्रहरी निरिक्षक सरोजकुमार ठकुराठीका अनुसार आर्थिक बर्ष ७६/७७ २२ ट्रक, १७ बस, १९ जिप कार, १५ ट्याक्टर, १०३ मोटरसाइकिल र ३० वटा अन्य सडक दुर्घटनामा २०६ वटा सवारी दुर्घटना भए । सो दुर्घटनामा परी ४९ जना पुरुष, ११ जना महिला, ८ बालक र १ बालिकाले ज्यान गुमाए ।

सरकारले पूर्ण रुपमा गरेको लकडाउनमा सडक दुर्घटना र ज्यान गुमाउने संख्या भने तुलनात्मक रुपमा बढी रह्यो । विश्व महामारीको रुपमा फैलिएको कोरोना १९ का कारण सरकारले चैत्र ११ गते देखि लकडाउन गरे तापनि सो अवधीमा सामान्य अवस्था भन्दा बढी सवारी दुर्घटना भएको ट्राफिक प्रहरी कार्यालय कैलालीको भनाई छ । यस अवधीमा भएका ४० वटा सवारी दुर्घटनामा २२ जनाले ज्यान गुमाए । ज्यान गुमाउनेमा १६ जना पुरुष, ३ महिला र ३ जना बालक रहेका छन् । “जिल्लामा सवारी चाप बढी रहेको छ,” प्रहरी निरिक्षक ठकुराठीले भने “मानिसहरुमा ट्राफिक नियम सम्बन्धी जनचेतना कमीका कारण सडक दुर्घटना बढी भई रहेको छ ।”

लाईसेन्स विना सवारी चलाउनु, तिब्र गतिमा गाडी चलाउनु, मादक प्रदाथ सेवन गरी सवारी चलाउनु सामान्य रुपमा पनि ट्राफिक नियमको पालना नगर्नु सडक दुर्घटनाको मूख्य कारण भएको शिक्षाविद् बद्री लम्सालको भनाई छ । ट्राफिक प्रहरी मात्र भएर होइन, ट्राफिक नियमको पालना गरी सवारी चलाए सवारी दुर्घटनामा कमी हुने उहाँको भनाई छ ।

“अपरिपक्क चालकहरु न्यून तलबमा काम गर्छन,” शिक्षाविद् लम्सालले भने, “तीनीहरुमा सवारी मालिकको हो, दुर्घटना भई हाले १५(२० दिन मात्र सजाय हुन्छ, भन्ने सोचका कारण लापरवाही तवरले सवारी चलाउदा अप्रिय घटना हुन्छ ।” साथै पैदल यात्रुले समेत सडक पार गर्दा ट्राफिक नियम ध्यान दिनु पर्ने र स्थानीय सरकारको समेत जनतामा जनचेतना जगाउने काम गर्नुपर्ने शिक्षाविद् लम्सालको सल्लाह छ ।