कैलाली, १३ साउन/बझाङको बित्थडचिर गाउँपालिकाको आर्थिक बर्ष २०७६/०७७ को सार्वजनिक सुनुवाई सम्पन्न भएको छ । गाउँपालिकामा भएका सेवा प्रवाह तथा विकास निर्माण लगायतका योजनाका बारेमा सार्वजनिक सुनुवाई कार्यक्रम गरिएको हो ।
सार्वजनिक सुनवाई कार्यक्रममा गाउँपालिकामा आर्थिक बर्ष ०७६/७७ को बार्षिक कामहरु बारेको प्रगति प्रतिवेदन, आयव्यय प्रस्तुत गरिएको थियो । गाउँपालिकाले भौतिक पूर्वाधार तर्फ सडक, खानेपानी, वडा स्वास्थ्यका भवन लगायतका विभिन्न संरचना निर्माण सम्बन्धि, कृषि, पर्यटन लगायतका क्षेत्रमा संचालित कार्यक्रम, गाउँपालिकाको गुरुयोजना निर्माणको काम, सेवाग्राही नागरिकलाई गरिएको सहयोग, विभिन्न तालिम, गाउँपालिकाका तर्फबाट भएका अध्ययन अवलोकन भ्रमण लगायतका विषयमा प्रतिवेदनमा समावेश गरी प्रस्तुत गरिएको थियो ।
कार्यक्रममा सहभागीहरुले गाउँपालिकामा निमार्ण भएका ६ ओटा वडा स्वास्थ्य भवन मध्ये ३ ओटा भवनको भुक्तानि नपाएको भन्दै गुनासो राखेका थिए । यस्तै सडक तथा विभिन्न पूर्वाधार निर्माणका क्रममा ठेकेदारहरुले लामो समयसम्म काम नगरेको विषयमा ध्यानाकर्षण गराएका थिए ।
यसका साथै स्थानीय कृषक हरिदत्त अवस्थिले कृषिमा गाउँपालिकाले ध्यान दिन नसकेको गुनासो राखेका थिए । उनले बिउ विजन समयमा उपलब्ध नभएको, कृषि उत्पादनको बजार व्यवस्थापन नभएको, प्राकृतिक प्रकोपबाट कृषिमा भएको क्षतिको क्षतिपुर्तिको व्यवस्थापन लगायतका माग गरेका थिए । यस्तै क्वारेन्टिन व्यवस्थापनमा खटीएका जनप्रतिनिधी र स्वास्थ्यकर्मीहरुले भत्ता नपाएको बारे पनि सार्वजनिक सुनुवाईका क्रममा प्रश्न उठेको थियो ।
सो क्रममा सहभागीका जिज्ञासा, सल्लाह सुझावलाई सम्बोधन गर्दै गाउँपालिका अध्यक्ष प्रेम बहादुर बोहराले स्वास्थ्य भवनको भुक्तानिको बिषयमा माथिल्लो निकायमा पहल भइरहेको बताए । उनले भवन निमार्ण कार्य समयमै सम्पन्न नभएको कारण भुक्तानिमा ढिलाई भएको बताए । यस्तै गाउँपालिकामा सडक तथा विभिन्न पूर्वाधार निर्माणका कतिपय भुक्तानिहरु बाकी रहेकोले भदौ देखी काम सुरु हुने बताए ।
उनले कृषि क्षेत्रको विकास तथा कृषकमा समस्या समाधान गर्न गाउँपालिका सधै तयार रहेको बताउदै आर्थिक बर्ष २०७७/०७८ को बजेटमा कृषि क्षेत्रलाई प्रमुख प्राथमिकतामा राखेको बताए । यस्तै क्वारेन्टिनमा खटिएका जनप्रतिनिधी तथा स्वास्थ्यकर्मीहरुले पनि दैनिक हाजिरीको आधारमा भत्ता पाउने जानकारी गराए । अध्यक्ष बोहराले बित्थडचिर गाउँपालिकाले सेवा प्रवाहलाई थप प्रभावकारी बनाउने प्रतिवद्धता व्यक्त गरेका थिए ।
कार्यक्रममा जिल्ला समन्वय समिती प्रमुख खडक बहादुर खड्काले जिल्लाको प्रवेशद्धार बित्थडचिर गाउँपालिकाले कोरोना नियन्त्रण तथा रोकथामको क्षेत्रमा महत्वपुर्ण भुमिका खेलेको बताए । उनले विकास निमार्णको सवालमा गाउँपालिकाले उत्साहजनक प्रगती गरेको बताए ।
सार्वजनिक सुनुवाईमा सहजीकरण पत्रकार महासंघका जिल्ला अध्यक्ष जगदिश रोकाया र पत्रकार रमेश केसीले गरेका थिए । कार्यक्रमको औपचारीक उद्घाटन जिल्ला समन्वय समिती प्रमुख खडक बहादुर खड्काले गरेका थिए ।
सार्वजनिक सुनुवाईमा स्थानिय जनप्रतिनिधी, विभिन्न राजनितिक दलका पार्टी प्रतिनिधी, सुरक्षाकर्मी, पत्रकार लगाएत स्थानियहरुको सहभागीता रहेको थियो ।