काठमाडौं । सार्वजनिक मञ्चमा नेकपाका अध्यक्ष पुष्पकमल दाहाल प्रचण्डले मदन भण्डारीको प्रशंसा गरेर थाक्दैनन् । पार्टी एकताताक पनि प्रचण्डले मदनको खुबै सम्झना गरे । २६ महिनाअघि, पार्टी एकता गर्ने दिनको बिहान पनि प्रचण्डले साविक एमाले मुख्यालय अघिल्तिर उभिएर मदन भण्डारीसँग पार्टी एकता गर्ने प्रसङ्ग चलिरहँदा उनी मारिएको चर्चा गर्दै कार्यकर्ताको मन जित्ने खोजे । र, पार्टी एकताको घोषणासभामा पनि त्यही कथन दोहोर्याए ।
मदनको प्रशंसा गरे पनि प्रचण्ड जनताको बहुदलीय जनवाद ९जबज०प्रति कुनै मोह छैन । जनताको बहुदलीय जनवादलाई यथास्थितिवादको पृष्ठपोषक र बुर्जुवा, संशोधनवादी विचारधाराको रूपमा बुझ्दै र अर्थ्याउँदै आएका छन् । उनको यही अडानका कारण एकीकृत पार्टीको अन्तरिम कार्यदिशाको स्थान जनताको जनवादले ओगट्यो । यद्यपि, त्यसका धेरै नीति, विचार र दृष्टिकोण जनताको बहुदलीय जनवादबाटै ‘साभार’ छन् ।
प्रचण्ड जनताको बहुदलीय जनवादबाट तर्किएर हिँडे पनि शीतल निवासले उनलाई औपचारिकरूपमै उत्तराधिकारी बन्न प्रस्ताव गरेको छ ।
त्यसको खुलासा स्वयम् प्रचण्डले गरेका हुन् । सोमबार आफूनिकट स्थायी कमिटी सदस्यहरूलाई निवासमा बोलाएर प्रचण्डले प्रधानमन्त्री केपी शर्मा ओली र राष्ट्रपति विद्यादेवी भण्डारीबाट जनताको बहदलीय जनवादको नेता बन्न प्रस्ताव आएको बताएका हुन् ।
भेलामा प्रचण्डले जबज मान्न तयार भए पार्टी अध्यक्ष ओलीले नेतृत्व हस्तान्तरण गर्न तयार रहेको बताएको ब्रिफिङ गरेका थिए ।
“प्रधानमन्त्री ओलीजी सधैँ जनताको बहुदलीय जनवाद नै पार्टीको कार्यदिशा हुनुपर्छ, मार्गदर्शक सिद्धान्त हुनुपर्छ भनेर कुरा उठाउनुहुन्छ । हामी जबजबाट धेरै अगाडि बढिसक्यौैं । तर, उहाँहरू उही पुरानै कार्यक्रमतिर फर्किउँ भन्नुहुन्छ,” प्रचण्डको भनाइ उद्धृत गर्दै पार्टी स्थायी कमिटी सदस्य गणेश साहले भने ।
पार्टी स्थायी कमिटी सदस्य लिलामणि पोखरेल पनि अध्यक्ष प्रचण्डलाई जबजको नेता बन्न प्रस्ताव आएको बताउँछन् । भेलामा प्रचण्डले जबज मान्ने अस्वीकार गरेको बताएको पोखरेलको भनाइ छ । “जबज मान्न तयार हो भने पार्टी अध्यक्ष बनाउन हामी तयार छौं भनेर प्रस्ताव आएको रहेछ, ट्र्यापमा पनि पार्न खोजिएको रहेछ,” पोखरेलले बाह्रखरीसँग भने, “प्रचण्डले पछाडि फर्कने अवस्था नरहेको भन्दै इन्कार गर्नुभएछ ।”
स्रोतका अनुसार शीतल निवासमा बोलाएर राष्ट्रपति विद्यादेवी भण्डारीले पार्टीको सैद्धान्तिक, वैचारिक कार्यदिशा जबज हुनुपर्ने भन्दै लबिङ तीव्र पारेकी छन् ।
अघिल्लो वर्षको भदौमा वामदेव गौतमलाई जबज पक्षमा लाग्ने सर्तमा विधानमै नभएको उपाध्यक्ष र संगठन विभाग प्रमुख एकसाथ प्रस्ताव गरिएको थियो । त्यसमा मुख्य भूमिका शीतल निवासकै थियो ।
शीतल निवासमा भएको पटकपटकको छलफलले वामदेव जबज बोकेर हिँड्न तयार रहेको बताएका थिए । दैनिक पत्रिकामा लामो आलेख लेखेर इमान्दारिता पनि देखाएका थिए ।अहिले प्रचण्डलाई पनि जबज मान्न राजी भए मङ्सिरमै महाधिवेशन गरेर एकल अध्यक्ष छाड्न तयार रहेको भन्दै दबाब सिर्जना गरिएको स्रोतको दाबी छ ।
“शनिबार सचिवालयको बैठकपछि शीतल निवासलाई साक्षी राखेर प्रचण्डलाई जबजमा ‘कन्भिन्स’ गराउन खोजिएको रहेछ । तर, पूर्वमाओवादीको ठूलो हिस्सा जबज विरोधी रहेको र जबज स्वीकार्दा पूर्वमाओवादी केन्द्र एमालेमा विलय भएको सन्देश जाने भएकाले प्रचण्डले स्वीकार्नु भएन,” भेलामा सहभागी एक स्थायी कमिटी सदस्यले जानकारी दिए ।
स्थायी कमिटी सदस्य हरिबोल गजुरेल पनि जबजमा जाने हो भने आन्दोलन पछाडि फर्कने ९पश्चगमनको दिशामा जाने० बताउँछन् । “अहिलेको अवस्थामा न जनताको बहुदलीय जनवादमा फर्कन सकिन्छ न एक्काइसौं शताव्दीको जनवादमा फर्कन सकिन्छ । अब समाजवादी विचार, कार्यदिशा तय गरेर जानुपर्छ । दस्तावेज तयार पारेर दुई–तीन महिना बहस, छलफल चलाउनुपर्छ,” उनी भन्छन् ।
प्रचण्ड अर्ली महाधिवेशन गरेर एकल अध्यक्ष लिन तयार भइसकेको थिए । बीचमै जबजको प्रसङ्ग आएपछि हच्किएको स्रोतको दाबी छ । तथापि, बालुवाटारले उनलाई मनाउने प्रयत्न जारी राखेको पूर्वमाओवादी केन्द्रनिकट नेताहरू बताउँछन् ।
