धनगढी, २३ जेठ- सेती प्रादेशिक अस्पतालमा उपचाररत ६ जना कोरोना संक्रमितलाई निको नहुदै अस्पतालले घर पठाएको छ । शुक्रबार दिउसो २ बजे अस्पतालले डिस्चार्ज गरेका उनीहरु कहाँ जाने भनेर अन्योलमा रहेका छन् । अस्पतालको आइसोलेसनमा उपचाररत अछामको मेल्लेख गाउँपालिकाका ३२ बर्षीय पुरुष र ११ वर्षीय बालिका, बैतडीको शिवनाथ गाउँपालिका वडा नम्वर १ का २० र २७ बर्षीय पुरुष तथा शिवनाथ गाउँपालिका वडा नम्वर २ का २० र २२ बर्षीय पुरुषलाई डिस्चार्ज गरिएको थिया ।
डिस्चार्ज गरेका ६ जना कोरोना संक्रमित धनगढीमै अलपत्र परेका छन् । दिउसो २ बजे उनीहरुलाई सेती प्रादेशिक अस्पतालको आइसोलेसनबाट डिस्चार्ज गरीएकोमा सम्बन्धित जिल्लासम्म पुगाउने व्यवस्था नभएपछि उनीहरु धनगढीमा अलपत्र परेका हुन् । आज बिहानै देखि लगातार पानी पनि परिरहेकाले उनीहरु भिज्दै अस्पतालबाट हिडेर बजार तिर निस्केका छन् । त्यहाँबाट निस्किएपछि उनीहरुले अस्पताल आसपासका क्षेत्रका क्षेत्रहरुको होटेलमा खाना नास्ता समेत खाएका छन् ।
डिस्चार्ज गरिएका उनीहरुले भने –‘एक्कासी अस्पतालको आईसोलेसनबाट घर जान भनियो तर न गाडीको व्यवस्था गरिएको छ न त आजका लागि वस्ने व्यवस्था नै गरिएको छ । कहाँ जाने अन्योलमा छौ ।’ शिवनाथ गाउँपालिकाले एम्बुलेन्स पठाउने भनेपनि एम्बुलेन्स भोली मात्रै पुग्ने भएकाले उनीहरुले आज कहाँ बस्ने कुनै टुङगो छैन । ‘११ वर्षीय छोरी र मलाई पनि अस्पतालले घर जान भनेको छ,’ अछामका ३२ बर्षीय संक्रमित पुरुषले भने– ‘गाउँपालिकालाई गाडीका लागि समन्वय गर्न भनिएको छ तर मसंग कसैको नम्वर छैन, कसलाई भनौं ।
सेती प्रादेशिक अस्पतालका मेसु डाक्टर हेमराज पाण्डेयले स्वास्थ्य मन्त्रायले जारी गरेको निर्देशन अनुसार उनीहरुलाई डिस्चार्ज गरिएको बताउँदै सम्बन्धित पालिकासम्म पुगाउने जिम्मेवारी आफ्नो नरहेको बताए । यस अघि संक्रमितको लगातार दुई पटक नेगेटिभ रिपोर्ट आएपछि अस्पतालबाट डिस्चार्ज गर्ने व्यवस्था रहेकोमा स्वास्थ्य मन्त्रालयले नयाँ निर्देशिका जारी गरेपछि उनीहरुलाई डिस्चार्ज गरिएको हो । लक्षण नदेखिएको र स्वास्थ्य समस्या नभएका संक्रमितलाई १४ दिन आइसोलेसनमा राखेर डिस्चार्ज गर्न पाइने निर्देशिका पारितसँगै यी ६ जनालाई डिस्चार्ज गरिएको अस्पतालले जनाएको छ ।