धनगढी, २१ असार- सुदूरपश्चिम प्रदेश सभामा शनिबार आह्वान गरिएको बैठक प्रतिपक्षी दल नेपाली काँग्रेस र राजपा संसदले बैठक बहिस्कार गर्ने भएका छन् ।

सत्तापक्ष र प्रतिपक्षी दल बिच पटक–पटक सहमतिका लागि बैठक बसेपनी सहपति जुट्न सकेको छैन । शनिबार मुख्यमन्त्री कार्यालयमा दुईपक्ष बैठकमा लिखित सहमती गर्ने भनिएपनि सत्तापक्षले हस्ताक्षर गर्न नमानेपछि सहमति जुट्न नसकेको प्रदेश सदस्य अम्बि थापाले जानकारी दिईन् । अहिले नेपाली काँग्रेस संसदीय दलमा बैठक जारी रहेको छ ।

सहमति नभएपछि प्रतिपक्ष दल काँग्रेस र राजपाले शनिबार ४ बजेको संसद बैठक बहिस्कार गर्ने रणनिती बनाएको प्रमुख प्रतिपक्षी दलका संसदीय दलका नेता डा. रणबहादुर रावलले जानकारी दिए ।

असार १ गते बजेट पेश भएपछि बजेट माथि छलफलका लागि असार ५ गते डाकिएको प्रदेश सभाको बैठक सोही दिन दिन देखि अवरुद्ध हुँदै आएको छ । बुधबार बजेट माथि छलफल हुनै नपाई बैठक छैंटौं पटक स्थगित भयो । प्रदेश सभाका सचिव रामसिंह धामीका अनुसार अर्को बैठक असार २१ गते शनिबार राखिएको छ ।

अपारदर्शी रुपमा योजनामा पैंसा राखिएको र अर्थ विविधमा योजनाका नाम नराखेरै बजेट राखिएकोले त्यसलाई बे्रकडाउन गरेर मात्रै पारित गर्नुपर्छ भन्ने आफ्नो दलको अडान रहेको र सो अडानमा सत्तापक्ष सहमत हुन नसक्दा प्रदेश सभाको बैठक अनिश्चित बनिरहेको डा. रावलले जानकारी दिनुभयो । अन्य प्रदेशमा बजेट पारित भइसकेको अवस्थामा सुदूरपश्चिम प्रदेशमा बजेट माथि छलफल समेत प्रारम्भ हुन सकेको छैन् ।