धनगढी,७ असार । धनगढीको एसपिए कलेजमा ‘धनगढी खुला स्क्र्याबल प्रतियोगिता २०२४’ सुरु भएको छ । एसपीए स्पोर्टस क्लब र स्क्र्याबल क्लब धनगढीको संयुक्त आयोजनामा शुक्रबारबाट प्रतियोगिता सुरु भएको हो ।

प्रतियोगिता ८ गतेसम्म सञ्चालन हुनेछ । जुनसुकै उमेर समूहका विद्यार्थीले पनि भाग लिन पाउने उक्त प्रतियोगितामा हाल कञ्चनपुर, कैलाली, दाङ, रुपन्देही, नवलपरासी, चितवन, कास्की र हेटौडा गरी ८ जिल्लाका विभिन्न राष्ट्रिय तथा अन्तर्राष्ट्रिय प्रतियोगिताहरू खेली सकेका ११ देख २६ वर्ष उमेर समूहका खेलाडीहरू सहभागी भएका छन् । पहिलो दिन १० खेल खेलाईएको प्रतियोगितामा दोस्रो दिन ५ खेल खेलाइने आयोजकले जनाएको छ ।

उक्त प्रतियोगितामा विभिन्न सांस्कृतिक प्रस्तुतिहरू, स्थानीय परिकारहरूको स्वाद लिन पाइनुका साथै विभिन्न स्थानबाट आउने प्रतियोगीहरूलाई आवासको व्यवस्था पनि गरिएको एसपिए स्पोट्र्स क्लबका अध्यक्ष गोबिन्द भट्टले जानकारी दिए । त्यसका साथै धनगढी क्षेत्रको भ्रमण गराइने व्यवस्था मिलाइएको पनि उनले बताए ।

के हो स्क्र्याबल खेल ?
स्क्र्याबल क्लबका केन्द्रीय अध्यक्ष केशव प्रसाद पराजुलीका अनुसार दोस्रो विश्व युद्ध पश्चात् इ.सं. १९३८ बाट सुरु भएको स्क्र्याबल खेल एक शब्द सोच्न सक्ने शक्तिको विकास गर्ने खेल हो । स्क्र्याबल बालबालिका देखी जुनसुकै उमेर समूहका व्यक्तिहरूले पनि खेल्न मिल्छ भने यो स्बोर्डमा ‘पजल’ मार्फत अक्षरहरूको संयोजन गरेर अङ्ग्रेजी शब्द निर्माण गर्न सिकाइने पद्धति हो ।

अन्य खेलहरूले शारीरिक तन्दुरुस्ती लगायतका विषयहरूमा बढी महत्वपूर्ण भूमिका खेले जस्तै यो खेलले पनि बौद्धिक तथा मानसिक रूपमा मानवलाई अब्बल बनाउने पराजुलीको भनाई छ । स्क्र्याबल खेल नेपालमा पहिलो पटक सन् २०१५ मा सुरुवात गरिएको थियो । शब्दको खेलका रूपमा लिइने यो खेलले विद्यार्थीमा सिकाइप्रति उत्प्रेरणा जाग्ने, शब्द भण्डारको वृद्धि हुने, खेलमै सिकाइ हुने, स्मरण शक्तिको विकास हुने, विद्यार्थीलाई रचनात्मक बन्न प्रेरित गर्ने गरेको देखिन्छ ।

जसमा दुई देखि चार जनासम्म खेलाडीहरूले शब्दहरू निर्माणका लागि विभिन्न बिन्दुमानहरूको ‘काउन्टर’ प्रयोग गर्ने गर्छन् भने साधरणतया दुई जनाको बिचमा खेल खेलाइँदै आएको पाइन्छ । स्क्र्याबल खेलको नेपालीमा पनि खेलाइने व्यवस्था भए पनि हाल अङ्ग्रेजी अक्षरहरू मा नै खेल्ने प्रचलन बढी छ ।

प्रतियोगिताको उद्घाटन समारोहमा एसपीए कलेजका क्याम्पस प्रमुख योगराज उपाध्यायले खेलाडी तथा सम्पूर्ण सहभागीहरू लाई क्रिकेटको सहर धनगढी तथा एसपीए कलेजमा स्वागत गरेका थिए । त्यस्तै, कलेजका प्रबन्ध निर्देशक सुवास विक्रम शाहीले विभिन्न खेलकुद गतिविधिहरू बारे जानकारी दिँदै प्रतियोगीहरू लाई सफलताको शुभकामना व्यक्त गरे ।