निजी क्षेत्रका इन्टरनेट सेवाप्रदायकले थोरै स्पिड भएका प्याकेज बन्द गर्दा टेलिकमले यो सुविधा सुरु गरेको हो । टेलिकमका अनुसार ग्राहकले नयाँ प्याकेजका रूपमा ३० एमबीपीएस गतिको फाइबर इन्टरनेट वार्षिक चार हजार ९९९ रुपैयाँमै प्राप्त गर्न सक्नेछन् । वार्षिक शुल्कलाई मासिक रूपमा हिसाब गर्दा यो प्रतिमहिना करिब ४१७ रुपैयाँ मात्र हुन आउँछ ।

१२ महिनाको समयावधि रहने यस प्याकेजका लागि ग्राहकले अतिरिक्त जडान शुल्क तिर्नुपर्ने छैन । टेलिकमले यसमा लाग्ने नियमित ५०० रुपैयाँको जडान शुल्क पूर्ण रूपमा छुट गरेको छ ।

यसैगरी, टेलिकमले तीव्र गतिको इन्टरनेट चाहने प्रयोगकर्ताका लागि वाई-फाई सिक्स इन्डिभिजुअल प्याकेज (WiFi 6 Individual Package) समेत सञ्चालनमा ल्याएको छ । यसअन्तर्गत ग्राहकले वार्षिक इन्टरनेट र टेलिफोन प्याकेज एकैसाथ जोड्न सक्नेछन् । जसअनुसार १०० एमबीपीएस गतिको प्याकेज वार्षिक ११ हजार ४९९ रुपैयाँ र १५० एमबीपीएसको प्याकेज वार्षिक १२ हजार ९९९ रुपैयाँमा उपलब्ध हुनेछ । त्यस्तै, सोही प्रकृतिको २०० एमबीपीएस गतिको वार्षिक प्याकेजका लागि १६ हजार ४९९ रुपैयाँ शुल्क तोकिएको छ ।

वार्षिक प्याकेज लिने ग्राहकहरूलाई टेलिकमले थप लाभका रूपमा ८०० देखि १००० एमबीसम्मको मोबाइल डेटासमेत निःशुल्क उपलब्ध गराउने जनाएको छ । १२ महिनाको समयावधि रहने यी सबै वाई-फाई सिक्स तथा नयाँ प्याकेजहरू जडान गर्दा ५०० रुपैयाँको जडान शुल्क नलाग्ने व्यवस्था गरिएको छ ।