कैलाली, ३० साउन / सुदूरपश्चिम प्रदेश सरकारका नवनियुक्त मुख्यमन्त्री खगराज भट्टले हिजो प्रदेशको स्वास्थ्य सेवा सुधारलाई प्राथमिकतामा राख्दै सर्वसाधारण नागरिकलाई सहज र गुणस्तरीय उपचार सेवा उपलब्ध गराउने गरी आफ्नो पहिलो निर्णय गरे ।
शुक्रबार मुख्यमन्त्रीमा नियुक्त भएका भट्टले पद तथा गोपनीयताको शपथ लिएर कार्यभार सम्हालेपछि बसेको पहिलो मन्त्रिपरिषद् बैठकले प्रदेशभरका अस्पतालमा डायलाइसिस सेवा विस्तार गर्ने निर्णय गरेको हो ।
प्रदेशका नागरिकहरूको सहजताका लागि मुख्यमन्त्रीले गरेको पहिलो निर्णय अघिल्लो सरकारले ल्याएको नीति तथा कार्यक्रममै समेटिएको थियो ।
‘प्रदेशका अस्पतालमा डायलाइसिस सेवा विस्तार गर्ने निर्णयअन्तर्गत सेतीमा ५, महाकालीमा ४, टीकापुरमा ३, लम्कीचुहामा ५ तथा बयलपाटा, जोगबुडा प्रादेशिक अस्पतालसहित अन्य जिल्ला अस्पतालहरूमा २–२ शय्या थपिनेछन्,’ आर्थिक वर्ष २०८३/०८४ को नीति तथा कार्यक्रममा सरकारले समेटेको थियो ।
प्रदेश प्रमुख नजिर मियाँले प्रस्तुत गरेको नीति तथा कार्यक्रमको ४८ नम्बर बुँदालाई टेकेर सेती प्रादेशिक अस्पतालमा पाँच, महाकाली प्रादेशिक अस्पतालमा चार र टीकापुर प्रादेशिक अस्पतालमा तीन डायलाइसिस शय्या थप गर्ने मन्त्रिपरिषद् बैठकले निर्णय गरेको छ ।
त्यस्तै, लम्कीचुहा अस्पतालमा पाँच शय्या तथा बयलपाटा र जोगबुडा प्रादेशिक अस्पतालसहित प्रदेशका सबै जिल्ला अस्पतालमा दुई–दुई डायलाइसिस शय्या विस्तार गर्ने निर्णय गरिएको छ ।
अघिल्लो सरकारले डायलाइसिस सेवा विस्तार गर्ने भन्दै बजेटसमेत राखेको थियो । तर, उक्त बजेट पास भएन ।
अहिले नयाँ सरकारले फेरि त्यससम्बन्धी निर्णय गरेपछि मिर्गौला रोगी तथा नियमित डायलाइसिस आवश्यक पर्ने बिरामीले उपचारका लागि टाढा जानुपर्ने बाध्यता केही हदसम्म कम हुने अपेक्षा गरिएको छ ।
शाह सरकारले डायलाइसिस विस्तार गर्ने नीति लिए पनि यो भट्ट सरकारको नेतृत्वमा बनेपछिको पहिलो बैठकमा विभागीय मन्त्रालयले प्रस्ताव लगेका थिए । नीति कार्यक्रममा आएको झण्डै अढाइ महिना पनि सामाजिक विकास मन्त्रालयले हिजो मन्त्रिपरिषद् बैठकको लागि स्वीकृति प्रदान गरेको थियो ।
हिजै सामाजिक विकास मन्त्री सन्तोष शर्मा थापाले यसलाई मन्त्रिपरिषद् बैठकमा प्रस्ताव लगेका थिए । आफूले ल्याएको नीति अनुसार वर्तमान सरकारले निर्णय गरेको प्रति निर्वतमान मुख्यमन्त्रीले धन्यवाद व्यक्त गरेका छन् ।
‘शुक्रबार नवनियुक्त मुख्यमन्त्रीको नेतृत्वमा बसेको सुदूरपश्चिम प्रदेश सरकारको पहिलो मन्त्रिपरिषद् बैठकले आर्थिक वर्ष २०८३/८४ को नीति तथा कार्यक्रममा समावेश गरी मेरो कार्यकालमा अघि बढाइएका स्वास्थ्य सेवा विस्तारका विषयलाई पहिलो निर्णयका रूपमा कार्यान्वयनमा लैजाने निर्णय गरेकोमा अत्यन्त खुसी र आभारी छु । आर्थिक वर्ष २०८३/८४ मै सो अस्पतालका लागि आवश्यक बजेटसमेत विनियोजन गरिसकेको अवस्था थियो,’ उनले सामाजिक सञ्जालमा लेखेका छन्, ‘मेरो कार्यकालमा अघि बढाइएका जनमुखी योजना तथा नीतिहरूलाई निरन्तरता दिइएकोमा नयाँ सरकारप्रति हार्दिक धन्यवाद तथा सफल कार्यकालको शुभकामना ।’
