धनगढी, २२ साउन  / भदौ १७ गते धनगढीमा आयोजना हुने ‘सुदूरपश्चिम गाईजात्रा सिजन–२’ को टिकट प्रायोजक कालभैरव ज्वेलर्स प्रालि धनगढी बनेको छ । सुदूरपश्चिमको मौलिक कला, संस्कृति र गाईजात्रा परम्पराको संरक्षण तथा प्रवर्द्धनसँगै हास्य–व्यंग्यमार्फत सामाजिक सचेतना फैलाउने उद्देश्यले बैजनाथ सञ्चार प्रालिको आयोजनामा कार्यक्रम हुन लागेको हो।

धनगढीस्थित एस।टी।एस। सिनेमा हलमा हुने कार्यक्रममा सुदूरपश्चिमका चर्चित हास्य–व्यंग्य कलाकार तथा अभिनेताहरूको प्रस्तुति रहनेछ। व्यंग्य नाटक, कविता, गीत–संगीत, देउडा तथा मौलिक लोक–सांस्कृतिक प्रस्तुतिसमेत कार्यक्रमका आकर्षण रहने आयोजकले जनाएको छ।

कार्यक्रमको टिकट प्रायोजन गर्दै कालभैरव ज्वेलर्स प्रालिका प्रोप्राइटर जगत र बिन्दुले सुदूरपश्चिमको कला, संस्कृति र स्थानीय प्रतिभाको प्रवर्द्धनमा निजी क्षेत्रले पनि आफ्नो भूमिका निर्वाह गर्नुपर्ने बताए।

उनीहरूले मनोरञ्जनसँगै सामाजिक विकृति र विसंगतिविरुद्ध जनचेतना फैलाउने उद्देश्यले आयोजना हुन लागेको गाईजात्रा कार्यक्रमलाई सहयोग गर्न पाउँदा खुसी लागेको बताए। स्थानीय कलाकार तथा मौलिक संस्कृतिको संरक्षणका लागि हुने यस्ता गतिविधिमा आगामी दिनमा पनि आफ्नो क्षेत्रबाट सहयोग गर्ने प्रतिबद्धता उनीहरूको छ।

करिब १५ लाख रुपैयाँको लागतमा आयोजना हुन लागेको कार्यक्रममा लागुऔषध दुर्व्यसन, भ्रष्टाचार, साइबर अपराध, महिला तथा घरेलु हिंसा, बालअधिकार, युवा पलायन र सामाजिक विभेदजस्ता समसामयिक विषयलाई हास्य–व्यंग्यका माध्यमबाट प्रस्तुत गरिने आयोजकले जनाएको छ।

कालभैरव ज्वेलर्सले टिकट प्रायोजन गर्नुले निजी क्षेत्र र कला–संस्कृतिको क्षेत्रबीचको सहकार्यलाई समेत थप बल पुग्ने आयोजकको विश्वास छ।