धनगढी, १३ साउन / कैलालीको धनगढी उपमहानगरपालिका–४, न्युरोड टोलकी करिब २४ वर्षीया पूजा धानुक (धामी) को शंकास्पद मृत्यु प्रकरणमा माइती पक्षले किटानी जाहेरी दर्ता गरेका छन्। घटनालाई आत्महत्या नभई हत्या भएको आशंका गर्दै उनीहरूले आज मुद्दा दर्ता गरेका हुन्।

सोमबार साँझ करिब ४ः३० बजे पूजाको मृत्यु भएको थियो। ससुराली पक्षले भने उनले आत्महत्या गरेको दाबी गर्दै आएको छ। तर माइती पक्षले उक्त दाबी अस्वीकार गर्दै घटनामा संलग्नमाथि कानुनी कारबाहीको मागसहित मृतक पुजाका श्रीमान भरत धामी लगायत ५ जनाको नाममा मुद्दा दर्ता गरेको जनाएको छ।

समाचार तयार पार्दासम्म शवको पोस्टमार्टम हुन सकेको छैन। पोस्टमार्टम प्रतिवेदन र अनुसन्धानबाट प्राप्त तथ्यका आधारमा घटनाको वास्तविक कारण खुल्ने भएकाले सबै पक्षबाट आवश्यक अनुसन्धान अघि बढाइएको प्रहरीले जनाएको छ।