धनगढी, ६ असार / सुदूरपश्चिम प्रदेशमा लागू औषध सम्बन्धी अपराधले चिन्ताजनक रूप लिँदै गएको देखिएको छ। प्रदेश प्रहरी कार्यालय धनगढीले सार्वजनिक गरेको जेठ महिनाको प्रगति विवरण अनुसार एक महिनाको अवधिमा मात्रै लागू औषध सम्बन्धी ६२ वटा मुद्दा दर्ता भएका छन्। ती मुद्दामा संलग्न रहेको आरोपमा १०८ पुरुष र ७ महिला गरी ११५ जनालाई पक्राउ गरिएको छ।

प्रहरीका अनुसार पक्राउ परेकाहरूबाट ४५३ ग्राम १५६ मिलिग्राम चरेस, २६८ ग्राम १८३ मिलिग्राम खैरो हिरोइन, २३० ग्राम गाँजा, १७१ ट्याब्लेट र ४२ एम्पुल बरामद गरिएको छ। पछिल्ला वर्षहरूमा प्रदेशमा लागू औषधको प्रयोग तथा कारोबार बढ्दो क्रममा देखिनु सुरक्षा निकायका लागि चुनौती बन्दै गएको छ।

जेठ महिनाको तथ्याङ्कले प्रदेशको समग्र सुरक्षा अवस्थाको अर्को चित्र पनि देखाएको छ। एक महिनामा विभिन्न प्रकृतिका ३५७ वटा अपराध सम्बन्धी मुद्दा दर्ता भएका छन्। जसमध्ये ज्यान सम्बन्धी ६९, आत्महत्या सम्बन्धी ६३, चोरीका १०, सङ्गठित तथा आर्थिक अपराधका ८३, सामाजिक अपराधका ५०, महिला तथा बालबालिका सम्बन्धी ४१, सवारी ज्यान सम्बन्धी १३ र अन्य ३८ मुद्दा रहेका छन्। ती घटनामा संलग्न ३५५ जनालाई पक्राउ गरिएको छ भने ९९ जना अझै फरार रहेका छन्।

प्रदेशमा आत्महत्याका घटनाले पनि चिन्ता बढाएको छ। जेठ महिनामा मात्रै ६७ जनाले आत्महत्या गरेका छन्। आत्महत्या गर्नेमा २९ पुरुष, ३३ महिला, एक बालक र चार बालिका रहेका छन्। उमेर समूहका आधारमा हेर्दा २१ देखि ३० वर्ष उमेर समूहका २५ जना आत्महत्यामा परेका छन्, जुन सबैभन्दा बढी संख्या हो। वैशाख महिनामा भने ५८ जनाले आत्महत्या गरेका थिए।

अपराध नियन्त्रणका लागि प्रहरीले एक महिनामा २८ हजार ६० वटा सुरक्षा गतिविधि सञ्चालन गरेको जनाएको छ। पिकेट, चेकिङ, ग्रामीण गस्ती, एआरपी र एसआरपीमार्फत सुरक्षा निगरानी बढाइएको प्रहरीको दाबी छ। सोही अवधिमा प्रहरीले एक करोड ४४ लाख ६१ हजार ५५५ रुपैयाँ बराबरको भन्सार छलीका सामान बरामद गरेको छ।

सवारी व्यवस्थापनतर्फ पनि प्रहरी सक्रिय देखिएको छ। जेठ महिनामा ३ हजार १९५ सवारी साधनमाथि कारबाही गरिएको छ, जसबाट २७ लाख ७९ हजार रुपैयाँ राजस्व सङ्कलन भएको छ। त्यस्तै, एक महिनामा १६१ वटा सवारी दुर्घटनामा १३ जनाले ज्यान गुमाएका छन् भने २७९ जना घाइते भएका छन्।

प्रदेश प्रहरी कार्यालयका प्रवक्ता पदमबहादुर विष्टले लागू औषध, अपराध तथा दुर्घटना न्यूनीकरणका लागि प्रहरी परिचालनलाई अझ प्रभावकारी बनाइने बताएका छन्। तथापि, सार्वजनिक भएका तथ्याङ्कले सुदूरपश्चिममा लागू औषधको फैलावट, बढ्दो आत्महत्या र अपराधका घटनाले समाज तथा राज्य संयन्त्र दुवैका लागि गम्भीर चुनौती खडा गरिरहेको संकेत गरेका छन्।