धनगढी, माघ १६- धनगढीको जुगेडामा भईरहेको भीडब्लु प्रदेश स्तरीय महिला तथा पुरुष फुटबल प्रतियोगितामा विहीवार भएका दुई खेलमा स्टार सिटी क्लब र आयोजक मनकनमना युवा क्लब ए विजयी भएका छन् । धनगढी उपमहानगरपालिका वडा नम्बर १२ जुगेडामा मनकामना युवा क्लबको आयोजनामा भईरहेको भिडब्लु प्रदेश स्तरीय महिला तथा पुरुष फुटबल प्रतियोगिताको पुरुष तर्फको खेलमा स्टार सिटी क्लब र आयोजक मनकनमना युवा क्लब ए विजयी हुँदै सेमिफाईनलमा प्रवेश गरेका छन् ।

विहीवारको पहिलो खेलमा स्टार सिटीले आयोजक मनकनमना युवा क्लब वी लाई ५–० ले हरायो । स्टार सिटीको जितमा कलम देउवा र कुवेर सिंहले दुई दुई तथा रोशन खत्रीले एक गोल गरे । विहीवारको दोस्रो खेलमा आयोजक मनकामना युवा क्लब ए लमदरल्याण्ड युवा क्लबलाई ३–० ले हरायो । मनकामनाका लागि कृजल खड्काले दुई तथा सुरेश खत्रीले एक गोल गरे ।

प्रतियोगिता अन्तर्गत शुक्रवार पुरुष तर्फका खेल हुने छैनन् । पहिलो खेलमा मनकामना युवा क्लब र न्यु उपदेश युवा क्लब, दोस्रो खेलमा कालिका युथ क्लब र गौरीगंगा क्लब तथा तेस्रो खेलमा सुर्मादेखी क्लब र मसुरीया युथ क्लब बीच प्रतिस्पर्धा हुनेछ । २० गतेसम्म्म सञ्चालन हुने भिडब्लु प्रदेश स्तरीय महिला तथा पुरुष फुटबल प्रतियोगितामा पुरुष तर्फ १६ र महिला तर्फ ७ टीमले सहभागीता जनाएका छन् ।

प्रतियोगिताको पुरुष तर्फको विजेतालाई ७५ हजार तथा उपविजेतालाई ४१ हजार नगद पुरस्कार सहित ट्रफी मेडल र प्रमाणपत्र प्रदान गरिनेछ । त्यस्तै महिला तर्फको विजेतालाई २० हजार तथा उपविजेतालाई १० हजार नगद सहित ट्रफी मेडल र प्रमाणपत्र प्रदान गरिने आयोजक मनकामना युवा क्लबले जनाएको छ । प्रतियोगिताको मुख्य प्रायोजकमा वानस्टप अटोमोवाईल्स रहेको छ । यो भिडब्लु गाडीको आधिकारिक विक्रेता हो । त्यस्तै सह–प्रायोजकमा केटिएम डुक वाईक रहेको छ ।