धनगढी, ५ भदौ / सुदूरपश्चिम प्रदेशका मुख्यमन्त्री खगराज भट्टले मन्त्रिपरिषद्लाई पूर्णता दिएका छन्। मुख्यमन्त्री भट्टले नेपाली कम्युनिस्ट पार्टीबाट तीन मन्त्री र दुई राज्यमन्त्री नियुक्त गरेका हुन्।

भौतिक पूर्वाधार विकासमन्त्रीमा ओमविक्रम भाट सरल, उद्योग, पर्यटन वन तथा वातावरणमन्त्रीमा प्रकाश रावल, आन्तरिक मामिला तथा कानुनमन्त्रीमा खुसीराम डगौरा नियुक्त भएका छन्। त्यस्तै, उद्योग, पर्यटन, वन तथा वातावरण राज्यमन्त्रीमा इन्दिरा गिरी र भौतिक पूर्वाधार विकास राज्यमन्त्रीमा जानकी कुँवर नियुक्त भएका छन्।

सुदूरपश्चिम प्रदेश प्रमुख नजिर मियाँले नवनियुक्त मन्त्रीहरूलाई अहिले पद तथा गोपनीयताको शपथ गराएका छन्। त्यस्तै, मुख्यमन्त्री भट्टले राज्यमन्त्रीलाई शपथ गराए।

यससँगै सुदूरपश्चिम सरकारले पूर्णता पाएको छ। नेकपा एमालेबाट यसअघि तीन मन्त्री र एक राज्यमन्त्री नियुक्त भएका थिए।