धनगढी, २२ साउन /   नेपाली कांग्रेसका निवर्तमान सभापति तथा पूर्वप्रधानमन्त्री शेरबहादुर देउवा स्वदेश फर्किने तयारीमा रहेका बेला उनीविरुद्ध कुनै कानुनी मुद्दा वा पक्राउ पुर्जी जारी भएको छ कि छैन भन्ने विषयमा नेपाल प्रहरीले अभिलेख जाँच गरिरहेको जनाएको छ।

शुक्रबार प्रहरी प्रधान कार्यालयमा आयोजित पत्रकार सम्मेलनमा प्रहरी प्रवक्ता अविनारायण काफ्लेले देउवासम्बन्धी उपलब्ध रेकर्डहरूको अध्ययन भइरहेको जानकारी दिए। उनले आवश्यक तथ्य फेला परे कानुनअनुसार प्रक्रिया अघि बढाइने पनि उल्लेख गरे।

पत्रकारहरूले देउवा नेपाल फर्किएपछि उनलाई पक्राउ गर्ने वा अनुसन्धानको दायरामा ल्याउने कुनै कानुनी आधार छ कि छैन भन्ने प्रश्न गरेका थिए। त्यसको जवाफमा काफ्लेले भने, “यस विषयमा उपलब्ध रेकर्डहरू हेरिरहेका छौँ। तथ्यअनुसार आवश्यक प्रक्रिया अघि बढाइन्छ।”

यसअघि बिहीबार नेपाली कांग्रेसका नेता प्रकाशशरण महतले देउवा साउन २६ गते नेपाल फर्किने जानकारी दिएका थिए। देउवा लामो समयदेखि विदेशमा रहेका छन्।