धनगढी, १५ साउन / भारत-नेपाल सीमास्थित गौरीफन्टा सीमा नाकामा अन्तर्राष्ट्रिय मानव बेचबिखन विरुद्ध दिवस नेपाल र भारतका सुरक्षा निकाय तथा सामाजिक संस्थाको संयुक्त सहभागितामा विभिन्न सचेतनामूलक कार्यक्रम गरी मनाइएको छ।

भारतको सशस्त्र सीमा बल (एसएसबी) को एफ कम्पनीको आयोजनामा बिहीबार सम्पन्न कार्यक्रममा सीमापार मानव बेचबिखन नियन्त्रण, सुरक्षा निकायबीच समन्वय सुदृढीकरण तथा जनचेतना अभिवृद्धिलाई केन्द्रमा राखेर छलफल गरिएको थियो।

कार्यक्रमलाई सम्बोधन गर्दै एसएसबीका सहायक कमाण्डेन्ट रवि कुमार समोटाले मानव बेचबिखन सीमावर्ती क्षेत्रको गम्भीर चुनौतीका रूपमा रहेको उल्लेख गर्दै यसको प्रभावकारी नियन्त्रणका लागि नेपाल र भारतका सुरक्षा निकायबीच निरन्तर समन्वय, सूचनाको शीघ्र आदानप्रदान र संयुक्त प्रयास अपरिहार्य रहेको बताए।

उनले सीमामा हुने शंकास्पद गतिविधिमाथि समयमै निगरानी बढाउन, जोखिममा रहेका महिला तथा बालबालिकाको पहिचान गर्न र मानव बेचबिखनमा संलग्न सञ्जालविरुद्ध दुवै देशका निकायले एकीकृत रूपमा काम गर्नुपर्नेमा जोड दिए।

कार्यक्रममा एसएसबीको एन्टी ह्युमन ट्राफिकिङ युनिट, नेपाल प्रहरी र सशस्त्र प्रहरी बल (एपीएफ) का प्रतिनिधिहरूले सीमा क्षेत्रमा संयुक्त गस्ती, सूचना आदानप्रदान र समन्वयात्मक अभियानलाई थप प्रभावकारी बनाउने प्रतिबद्धता व्यक्त गरेका थिए।

यस्तै, कार्यक्रममा सहभागी सामाजिक संस्थाका प्रतिनिधिहरूले मानव बेचबिखन न्यूनीकरणका लागि सीमावर्ती समुदायमा नियमित जनचेतनामूलक अभियान सञ्चालन, परामर्श सेवा विस्तार तथा महिला र बालबालिकालाई लक्षित सचेतना कार्यक्रमलाई प्राथमिकता दिनुपर्ने धारणा राखेका थिए।

कार्यक्रमको अन्त्यमा नेपाल र भारतका सुरक्षा निकाय तथा सरोकारवाला संस्थाका प्रतिनिधिहरूले मानव बेचबिखन तथा ओसारपसारमा संलग्न सञ्जालविरुद्ध संयुक्त रूपमा कारबाही अघि बढाउने, सीमा क्षेत्रमा सुरक्षित आवागमन सुनिश्चित गर्ने तथा द्विपक्षीय सहकार्यलाई अझ प्रभावकारी बनाउने प्रतिबद्धता जनाएका छन्।