धनगढी, १४ साउन / कैलाली र कञ्चनपुरका केरा किसानले न्यूनतम मूल्यमा बगानबाट केरा बिक्री गरिरहे पनि बजारमा उपभोक्ताले थेग्नै नसक्ने गरी मूल्य बढाइएको भन्दै केरा उत्पादकहरूले कालोबजारी रोक्न सरकारसँग माग गरेका छन्।

केरा उत्पादक तथा व्यवसायी संघ कञ्चनपुर र कैलाली केरा उत्पादक संघले बिहिबार धनगढीमा संयुक्त पत्रकार सम्मेलन गर्दै किसानले हाल बगानबाट गुणस्तरअनुसार प्रतिदर्जन ६० देखि ६५ रुपैयाँमै केरा बिक्री गरिरहेको भए पनि उपभोक्ताले बजारमा अत्यधिक मूल्य तिर्न बाध्य भएको बताएका हुन्।

कैलाली केरा उत्पादक संघका अध्यक्ष दीपेन्द्र थारुका अनुसार किसानले उत्पादनको उचित मूल्यसमेत नपाइरहेका बेला बजारमा केराको मूल्य अस्वाभाविक रूपमा बढ्नुले बिचौलियामार्फत कृत्रिम अभाव सिर्जना गरी कालोबजारी भइरहेको आशंका बलियो बनेको छ। यसबाट एकातिर किसान मर्कामा परेका छन् भने अर्कोतर्फ उपभोक्ताले अनावश्यक आर्थिक भार बोक्नुपरेको थारुको भनाइ छ।

संघले सम्बन्धित सरकारी निकायलाई बजारको प्रभावकारी अनुगमन गरी कालोबजारी, कृत्रिम मूल्यवृद्धि तथा अनुचित नाफाखोरीमा संलग्न व्यक्ति वा संस्थामाथि कानुनबमोजिम कारबाही गर्न माग गरेको छ। किसान र उपभोक्ता दुवैको हित सुनिश्चित हुने गरी बजार व्यवस्थापन गर्न पनि सरकारलाई आग्रह गरेको छ।

यसैबीच संघले भदौदेखि असोज मसान्तसम्म काँचो केराको बगान बिक्री मूल्य प्रतिदर्जन ५५ देखि ६५  , कार्तिक देखि मंसिर मसान्तसम्म ४५-५० र पुस देखि माघ मसान्तसम्म ३० -३५ रुपैयाँ निर्धारण गरेको जनाएको छ।

कैलाली र कञ्चनपुरका सम्पूर्ण केरा कृषक तथा व्यवसायीलाई संघले तोकेको मूल्य कार्यान्वयन गर्न पनि पत्रकार सम्मेलन मार्फत आग्रह गरेका छन्।