धनगढी,४ साउन । सुदूरपश्चिमका सम्पुर्ण स्थानिय तहहरुमा कार्यरत स्वास्थ्यकर्मीहरु आन्दोलित बनेका छन । प्रदेश सरकारले ल्याएको स्थानीय तह (गठन तथा सञ्चालन) ऐन २०८१ को समायोजन ऐनको विरोधमा उनीहरु आन्दोलित भएका हुन् ।

आन्दोलित भएका स्वास्थ्यकर्मीहरुले आकस्मीक बाहेकका सेवाहरु ठप्प पारेका छन । शनिबार विज्ञप्ती जारी गर्दै स्थानिय तह स्वतन्त्र स्वास्थ्यकर्मी संघर्ष समिति सुदूरपश्चिमले प्रदेशका ८८ वटै स्थानिय तहहरुमा रहेका स्वास्थ्य संस्थाबाट प्रवाह गरिने आकस्मिक बाहेकका सम्पुर्ण सेवाहरु प्रवाह गर्न नसकिने जनाएको थियो । साथै उक्त विज्ञप्तीमा असार महिनाको मासिक रिर्पोट पनि प्रविष्ट गर्न नसकिने उल्लेख गरिएको छ । संघर्ष समितिका संयोजक राजेन्द्र सिँह साउँदले स्वास्थ्यकर्मीहरुको न्यायोचित माग सम्बोधनका लागि ज्ञापन पत्र बुझाउदा तथा धर्नामा बस्दा पनि छलफलमा नबोलाएको हुँदा आईतबार देखी सेवाहरु बन्द गरिएको बताएका छन ।

सुदूरपश्चिम सरकारले ल्याएको स्थानीय सेवा ऐनले सबैलाई समान किसिमको व्यवहार नगरेकाले आफूहरु आन्दोलनमा उत्रेको स्वास्थ्यकर्मीहरुको भनाई छ । स्वास्थ्यकर्मीहरूले कर्मचारी समायोजन ऐन, २०७५ ले व्यवस्था गरे अनुसार आफूहरूको दरबन्दी र सेवा सुविधा मिलाउनुपर्ने बताएका छन् । शुरुमा स्थानीय तहमा समायोजन गर्दा समेत स्वास्थ्यकर्मीहरुमाथि विभेद गरिएको र अहिलेको ऐनले पनि विभेद गरेको उनीहरुको आरोप छ ।