धनगढी, ५ असार /  कैलालीको अत्तरिया बस पार्क नजिकै एक ट्राफिक प्रहरी जवान अचेत अवस्थामा फेला परेका छन्। बुधबार राति करिब १० बजे अत्तरिया बसपार्कदेखि करिब २०० मिटर टाढा पहाड रोडमा ट्राफिक प्रहरी जवान सन्तोष चन्द अचेत अवस्थामा भेटिएका हुन्।

इलाका प्रहरी कार्यालय मालाखेतीका डिएसपी रण बहादुर चन्दका अनुसार प्रहरी टोलीले चन्दलाई उद्धार गरी उपचारका लागि मायामेट्रो अस्पताल, धनगढीमा पठाएको थियो। हाल उनी अस्पतालको आईसीयूमा उपचाररत छन्। प्रहरीका अनुसार घटनाको अनुसन्धान प्रविधिमार्फत भइरहेको छ।

यता, चन्दका आफन्तले भने घटनामा कुटपिट भएको आशंका व्यक्त गरेका छन्। उनकी श्रीमती विमला चन्दका अनुसार बुधबार साँझ ८ बजे उनी तरकारी लिन गएका थिए। म पटक-पटक फोन गर्दा पनि सम्पर्क हुन सकेन, उनले भनिन्, साढे १० बजे खड्का नामका चालकले खबर गरेपछि म त्यहाँ पुगेकी थिएँ। त्यो अवस्थामा मेरा श्रीमान होसमा हुनुहुन्नथ्यो।

उनले श्रीमानलाई कुटपिट गरी जंगलतर्फ लगेर फालिएको दाबी गरिन्। शरीरका संवेदनशील भागमा चोट छन्, यो दुर्घटनाजस्तो लाग्दैन, उनले भनिन्, म न्याय चाहन्छु, सत्य के हो त्यसको छानबिन होस्।