धनगढी, वैशाख १८/सुदूरपश्चिमको पर्यटन क्षेत्र, विशेषगरी होमस्टे प्रवर्धनका लागि राज्यको ध्यान केन्द्रित हुनुपर्ने  प्रदेश प्रमुख नजिर मियाँले बताए । उनले सुदूरपश्चिम प्रदेशस्तरीय होमस्टे मेला महोत्सवमा बोल्दै प्रदेश प्रमुख नजिर मियाँले उक्त कुरा बताएका हुन् । उनले सुदूरपश्चिममा अझै होमस्टे पर्यटनको अपेक्षित विकास हुन नसकेको स्वीकार गर्दै भने, “गण्डकी प्रदेशले जस्तो आफ्नो कला संस्कृतिको माध्यमबाट प्रदेश चिनाउन सफल भएको छ, सुदूरपश्चिम पनि त्यही बाटोमा अघि बढ्न सक्छ।”

प्रदेश प्रमुख मियाँले सुदूरपश्चिम अपार सम्भावना बोकेको प्रदेश भएको  बताउदै यहाँको संस्कृति, धर्म, जातीय विविधता र प्राकृतिक सम्पदाले यसलाई पर्यटनको केन्द्र बनाउन सकिने विश्वास व्यक्त गरे। “सुदूरपश्चिममा जे जति संस्कृतिहरु पाइन्छन्, त्यो नेपालका अन्य कुनै ठाउँमा पाइँदैन,” उनले भने।

उनले अघिल्लो समयको केन्द्रिकृत शासन प्रणालीले सुदूरपश्चिमलाई ओझेलमा पारेको बताउँदै संघीयता स्थापनापछि प्रदेश सरकारले विकासका काममा प्राथमिकता दिएको बताए। “२०७२ सालपछि संविधान बनेपछि संघीय प्रणाली सुरु भयो, नयाँ संरचना बने, तर अझै धेरै गर्न बाँकी छ,” मियाँले भने, “तर हामी निराश हुनु हुँदैन, उत्साहपूर्वक अगाडि बढ्नुपर्छ।”

कार्यक्रममा देशभरिबाट आएका प्रतिनिधिहरुलाई स्वागत गर्दै प्रदेश प्रमुख मियाँले सुदूरपश्चिमको होमस्टे पर्यटन प्रवर्धनमा सरोकारवालाको सक्रिय भूमिका आवश्यक रहेको बताए।