धनगढी,९ पुस । ‘सहिद दशरथ चन्द स्वास्थ्य विज्ञान विश्वविद्यालय विधेयक, २०८०’ आगामी हिउँदे अधिवेशनमा पेस गरिने भएको छ । लामो समयदेखि प्रतीक्षित उक्त विधेयक आगामी हिउँदे अधिवेशनको पहिलो बैठकमै पेस गर्ने तयारी गरिएको प्रतिनिधि सभाको शिक्षा, स्वास्थ्य तथा सूचना प्रविधि समितिका सभापति अम्मर बहादुर थापाले बताएका छन् ।

उक्त विधेयक २०८० माघ २९ गते राष्ट्रिय सभाबाट पारित भएर हाल प्रतिनिधि सभाको शिक्षा, स्वास्थ्य तथा सूचना प्रविधि समिति विचाराधीन अवस्थामा रहेको छ । सोमबार विश्वविद्यालयको स्थलगत अवलोकन गर्न गेटा पुगेका समितिका सभापति थापाले अगामी हिउँदे अधिवेशनमा नै विधेयक टेबल गर्ने प्रतिबद्धता गरेका हुन ।

‘हिउँदे अधिवेशनमा यो विधेयक टेबल गर्छौ । यो विधेयक अब अर्को सदनमा जाँदैन । हामीले यसको सरसल्लाह गरिसकेका छौ’ उनले भने ‘दीर्घकालीन योजना बनाउने भएकाले केही समय लागेको भए पनि यसमा काम चलिरहेको छ । हामीले प्रतिबद्धता जाहेर गरेका छौ । सहिद दशरथ चन्द राष्ट्रिय स्वास्थ्य विज्ञान विश्वविद्यालयको विधेयक पहिलो सदनमा विद्यालय शिक्षा विधेयक भन्दा अगाडि जान्छ । आगामी हिउँदे अधिवेशनमा विद्यालय शिक्षा विधेयक सँगै विश्वविद्यालयको विधेयक पेस हुन्छ ।’

उनले विधेयक पास गर्न ढिलाइ भएको रूपमा नलिन पनि आग्रह गरे । ‘भदो अन्तिम तिर हामीकहाँ यो विधेयक आएको हो । यसमा दुई तिन राउन्ड मिटिङ पनि गरिसकेका छौ’ उनले भने ‘यो गाउँपालिकाको ऐन बनाएको जस्तो हुँदैन । सबै प्रक्रिया पुरा गर्न समय लाग्छ ।’ उनले विधेयकको विषयमा यसै महिनाको ११ गते विज्ञहरू सँग छलफल कार्यक्रम राखिएको बताए । त्यसपछि आवश्यक संशोधनका लागि समय दिइने बताउँदै उनले यस क्षेत्रबाट पनि कुनै सुझाव, संशोधन भए छलफल गरेर जानकारी दिन आग्रह गरे ।

उनले एमबिबिएस अध्ययन गराउनको लागि कति शुल्क तोक्ने भन्ने कुरा पनि तोकिने भएकाले त्यसको लागि पनि स्थानीय स्तरमा छलफल गरेर सुझाव दिन आग्रह गरे । उनले विश्वविद्यालय कसरी चलाउन सकिन्छ भन्ने विषयमा रिपोर्ट बनाएर समितिलाई बुझाउन अस्पतालका निर्देशक डा। अशोक श्रीपाइलाई आग्रह गरे ।

गोदावरी नगरपालिकाका नगरप्रमुख वीरेन्द्र भट्टले विश्वविद्यालय सञ्चालनको लागि भौतिक संरचना तयार भएकाले यसमा मेडिकल कलेज सञ्चालन गर्न ३ सय शय्याको अस्पताल सञ्चालन गरिनुपर्ने बताए । उनले यस क्षेत्रका जनताको सहजै मेडिकल शिक्षा र स्वास्थ्यमा पहुँच पुगोस् भन्ने चाहना रहेको बताए ।

तत्कालीन पूर्वाधार विकास समितिका निर्देशक हेमराज पुजाराले मोडालिटीमा अब कुनै विवाद नभएकाले सरकारले विधेयक पास गरेर चाँडो काम अगाडि बढाउनु पर्ने बताए । उनले अहिलेको विधेयकमा सुदूरपश्चिमको लागि के भन्ने विषयमा उल्लेख नभएकाले त्यसमा सबैको ध्यान पुग्नुपर्ने बताए । ‘थोरै भए पनि यो क्षेत्रका लागि विधेयकमा रिजर्भेसन दिएको भए अझै राम्रो हुन्थ्यो’ उनले भने ‘हामीले यहाँ अध्ययन गर्न पाएको कोटामा यस प्रदेशको पनि केही कोटा छुट्टाउनु पर्छ । यसमा यो प्रदेशका माननीयज्यूले संशोधन हाल्न लगाउनु पर्छ ।’

स्थलगत अवलोकनका लागि आएको टोलीमा समितिका सदस्य महेन्द्र कुमार राई, ईश्वरी घर्ती, ज्ञानु बस्नेत सुवेदी, राम प्रकाश चौधरीको सहभागी रहेका थिए । अवलोकनका टोली सँगै सुदूरपश्चिम निवर्तमान मुख्यमन्त्री दीर्घ बहादुर सोडारी, गोदावरी नगरपालिकाका नगरप्रमुख वीरेन्द्र भट्ट लगायतको सहभागिता रहेको थियो ।

समितिका सचिव दशरथ धमलाले विद्यालय शिक्षा विधेयका सन्दर्भमा स्थानीय स्तरमा सुझाव सङ्कलन गर्न सुदूरपश्चिम आएको बेला विश्वविद्यालयको विधेयक पनि विचाराधीन अवस्थामा रहेकाले भौतिक संरचनाको अवस्थाको विषयमा अवलोकन गर्न समिति स्थलगत अवलोकनमा आएको बताए ।

यसैबिच समितिलाई शहीद दशरथ चन्द राष्ट्रिय स्वास्थ्य विज्ञान विश्वविद्यालय स्थापनार्थ सङ्घर्ष समितिले छिटो विश्वविद्यालयको विधेयक संसदमा पेस गर्न माग गर्दै ज्ञापन पत्र बुझाएको थियो । ज्ञापन पत्रमा ३ सय शय्याको अस्पताल सञ्चालन गरी चाँडो सांसदबाट विधेयक पास गराउन माग गरिएको छ । सरकारले २०७९ माघ २९ गते मन्त्रिपरिषदबाट गेटामा सहिद दशरथ चन्द स्वास्थ्य विज्ञान विश्वविद्यालय बनाउने घोषणा गरेको थियो ।