धनगढी, २१ असार । कैलालीको गोदावरी नगरपालिकाको सार्वजनिक सुनुवाई कार्यक्रम सम्पन्न भएको छ । मंगलबार प्रादेशिक सुशासन केन्द्र डोटीको सहयोग, पत्रकार महासंघ कैलालीको सहजिकरणमा गोदावरी नगरपालिकाले सार्वजनिक सुनुवाई कार्यक्रमको आयोजना गरेको हो ।

गोदावरी नगरपालिकाकी उपमेयर शारदा रोकायाको अध्यक्षतामा सम्पन्न सार्वजनिक सुनुवाई कार्यक्रममा सहभागिताको संख्या भने न्यून रहेको थियो ।

कार्यक्रममा बोल्दै उपमेयर रोकायाले कार्यक्रममा सबै वडाको सहभागिता हुनुपर्ने बताईन् । उनले वडाबाट नै जनताका बढी गुनासा आउने भएकाले वडा अध्यक्ष पनि सहभागि गराउनुपर्नेमा जोड दिईन् ।

आफूहरुले जनतालाई सेवा दिदाँ राम्रो संग सेवा दिन कर्मचारीलाई निर्देशन दिईएको उनले बताईन् । ‘हामीले नगरपालिकामा सुशासन कायम गर्ने गरी काम गरिरहेका छौ’ उनले भनीन् ‘हामी सर्वसुलभ सेवा दिन प्रतिवद्ध छौ ।’

स्थानीय निकायबाट संचालित विकास कार्यक्रम उपलब्ध सेवा, वस्तु र सुविधा सार्वजनिक गरी त्यस्ता बिषयका सम्बन्धमा सार्वजनिक थलोमा सेवाग्राही नागरिकले उठाएका प्रश्नहरुमा प्रष्टता ल्याउने र नागरिकबाट प्राप्त रचनात्मक सुभावलाई ग्रहण गर्न तथा जिम्मेवार संस्कार बसाउने उद्देश्यले सार्वजनिक सुनुवाई गरिन्छ । सोही उद्देश्य पुर्तिका लागि सार्वजनिक सुनुवाई गरेको भएपनि कार्यक्रममा सहभागि न्यून हुँदा कार्यक्रम अपेक्षित हुन नसकेको गुनासा आएका थियो ।

कार्यक्रमको समापनमा बोल्दै गोदावरी नगरपालिकाका प्रवक्ता गोपाल दत्त भट्टले कार्यक्रममा सहभागिता न्यून भएपनि यस्ता कार्यक्रम नियमित गर्नुपर्छ भन्ने सन्देश गएको बताए ।

उनले सहभागिता न्यून हुँदा भने खल्लो महशुस भएको बताए । ‘यो कार्यक्रममा यस क्षेत्रका आम जनता र मंञ्चमा जिम्मेवार व्यक्ति भएमा त्यसबाट सबैकुरा छर्लङ्ग हुन्थो’ उनले भने ‘कार्यक्रम सिमित मान्छे भएको कारणले अलिकती खल्लो पनि महशुस भएको छ ।’ उनले आगामी दिनमा कार्यक्रममा सहभागिता बढाउनु पर्नेमा जोड दिए । उनले नगरपालिकाले आगामी दिनमा कम्तीमा एक पटक सार्वजनिक सुनुवाई गराइने बताए ।

कार्यक्रममा २ जना सहभागिले मात्रै प्रश्न गरेका थिए । कार्यक्रममा सहभागितबाट उठेका प्रश्नको जवाफ नगरपालिकाका प्रमुख प्रशासकीय अधिकृत बसन्त कुमार खत्रीले दिएका थिए । कार्यक्रमको सहजकर्ता भोजराज जोशी रहेका थिए । कार्यक्रममा करिब ३० जनाको सहभागिता रहेको थियो ।