काठमाडौं ३० चैत। नेपाली कांग्रेसको केन्द्रीय कार्यसमिति बैठक अनिश्चितकालका लागि स्थगित गरिएको छ । कांग्रेसको सोमबार दिउँसो २ बजे बोलाइएको बैठक अनिश्चितकालका लागि स्थगित गरिएको केन्द्रीय सदस्य एनपी साउदले जानकारी दिएका छन् ।
उनले भने, “आज बस्ने बैठक स्थगित भएको छ । अर्को बैठकको मिति तय भएको छैन ।” वरिष्ठ नेता रामचन्द्र पौडेलका भाइ गोविन्दराज पौडेलको निधनको शोकमा केन्द्रीय कार्यसमिति बैठक स्थगित गरिएको कांग्रेस केन्द्रीय कार्यालयले जनाएको छ ।
यसअघि चैत २७ गते बस्ने भनिएको बैठक चैत ३० सम्मका लागि स्थगित गरिएको थियो । सोमबारको बैठकमा क्रियाशील सदस्यता नवीकरण र नयाँ क्रियाशील सदस्यता वितरणको समयावधि बढाउने कार्यसूची रहेको थियो । कांग्रेसले यसअघि चैत १० गतेसम्म क्रियाशील सदस्यता नवीकरण र वितरण गरी केन्द्रमा जानकारी दिन निर्देशन दिए पनि विभिन्न जिल्ला कार्यसमितिले क्रियाशील सदस्यता वितरण गर्न सकेका छैनन् ।
चैत २० गते बसेको केन्द्रीय कार्यसमिति बैठकले चैत ३० गतेसम्म क्रियाशील सदस्यता वितरण र नवीकरणको काम सम्पन्न गर्ने कार्यतालिका बनाए पनि काम सम्पन्न हुन सकेको छैन ।
