काठमाडौ, पुष १६/प्रधानमन्त्री कप राष्ट्रिय महिला क्रिकेट प्रतियोगितामा सुदुरपश्चिम प्रदेशमाथि प्रदेश नम्बर १ ले जित निकालेको छ ।

बुधबार भएको समुह बीको खेलमा प्रदेश नम्बर १ ले सुदुरपश्चिममाथि ५ विकेटको जित दर्ता गरेको हो । मौसमका कारण १६ ओभरमा छोट्याईएको खेलमा सुदुरले पहिले ब्याटिङ्ग गर्दै ८ विकेट गुमाएर ५३ रन बनाएको थियो ।

कबिता जोशीले १४ रन बनाउनु बाहेक अन्य कुनै खेलाडीले दोहोरो अंकको स्कोर छुन सकेनन् । प्रदेश १ की संगिता राईले ३, सबनम राईले २ , निग्मा तामाङ र रुबिना क्षेत्रीले समान १–१ विकेट लिए ।

५४ रनको सामान्य लक्ष्य प्रदेश नम्बर १ ले ५ बल बाँकी छँदै मात्र ५ विकेट गुमाएर पुरा गर्यो । कप्तान रुविना क्षेत्रीले बनाएको १२ रन टोलीको सर्वाधिक स्कोर रह्यो । प्रदेश १ ले १५ रन अतिरिक्त पाएको थियो ।

सुदुरकी दिपा जोराले २ तथा कबिता कुँवर र कबिता जोशीले समान १–१ विकेट लिए । राष्ट्रिय महिला क्रिकेट टिमकी कप्तान रुबिना क्षेत्री नेतृत्वको प्रदेश १ ले लगातार दोस्रो जित निकालेको छ ।

प्राप्त जितसंगै प्रदेश १ ले ४ अंक जोडेको छ र सेमिफाइनल नजिक पुगेको छ । समूह चरणको पहिलो खेलमा जित निकालेको सुदुर दोस्रो खेलमा भने पराजित बन्यो ।