धनगढी, पुष २/ लागु औषधसहित ४ जनालाई कञ्चनपुर प्रहरीले पक्राउ गरेको छ।

शनिबार जिल्लाको पुनर्वास नगरपालिका–४ घ गाउँ स्थित कार्गील डाँडाबाट २३ वर्षीय सरोजजंग शाहलाई लागु औषधसहित पक्राउ गरिएको कञ्चनपुरका प्रवक्ता प्रहरी नायब उपरीक्षक अमरबहादुर थापाले बताए।

उनको साथबाट ३६ ट्याबलेट नाईट्रोभेट बरामद गरिएको छ। यस्तै बेलौरी नगरपालिकाबाट समेत लागु औषधसहित थप ३ जनालाई पक्राउ गरिएको प्रहरी नायब उपरीक्षक थापाले बताए।

पक्राउ पर्नेमा बेलौरी नगरपालिका–९ का १८ वर्षीय निसान भट्ट, वेदकोट नगरपालिका– ७ बस्ने २१ वर्षीय मुकेश भट्ट र सोही ठाउँका १८ वर्षीय सन्देश बोहोरा रहेका उनले बताए।

उनीहरुको साथबाट ८ सय २० मिलीग्राम खैरो हिरोइन बरामद गरिएको छ। तीनै जना सवार म २प ७६ नम्बरको मोटरसाइकल चेकजाँचका क्रममा लागु औषधसहित उनीहरुलाई पक्राउ गरिएको प्रहरीले जनाएको छ।