काठमाडौं, १५ भदौ/ नेपाल कम्युनिस्ट पार्टी ९नेकपा० का स्थायी समिति सदस्य एवं पूर्वउपप्रधानमन्त्री भीम रावलले अरु देशमा भएको भए अर्थमन्त्री डा। युवराज खतिवडालाई राज्यद्रोहको मुद्दा लागिसक्ने बताएका छन्। सोमबार एमसीसी खारेज अभियानद्वारा आयोजित अन्तरक्रियामा बोल्दै नेता रावलले उक्त कुरा बताएका हुन्।

अन्तरक्रियामा बोल्दै नेता रावलले भने, ‘‘अर्थमन्त्री युवराज खतिवडाले राष्ट्रघाती एमसीसी सम्झौतामा हस्ताक्षर गर्नुभएको छ। यति ठूलो राष्ट्रघात गर्दा पनि केही मान्छेहरुले उहाँको संरक्षण गरिरहेका छन्। नेपालबाहेक अरु देशमा हुन्थ्यो भने अर्थमन्त्री खतिवडालाई राज्यद्रोहको मुद्दा लाग्थ्यो।’’

कार्यक्रममा नेता रावलले यथास्थितिमा एमसीसी सम्झौता पारित हुन नसक्ने बताए। उनले भने, ‘‘एमसीसी सम्झौताबारे नेकपाको कार्यदलले आफ्नो स्पष्ट धारणासहितको प्रतिवेदन बुझाइसकेको छ। यथास्थितिमा एमसीसी सम्झौता पारित हुन सक्दैन। हामीले सिफारिस गरेका प्रावधानमा संशोधन भए मात्र यो लागू हुन सक्छ। सम्बन्धित पक्ष संशोधन गर्न तयार नभए यो स्वतः खारेज हुन्छ, खारेज गराउँछौं।’’

नेता रावलले संविधानको प्रस्तावनामै समाजवादउन्मुख राज्यको प्रावधान राखिएका कारण नेपालले नवउदारवादी कार्यक्रम मान्न नसक्ने बताए। उनले भने, ‘‘हाम्रो संविधानले समाजवादउन्मुख राज्यको व्यवस्था गरेको छ। तर, अझै पनि राज्यका कैयौं अंगले नवउदारवादी अर्थतन्त्रको वकालत गरिरहेका छन्। यो आफैमा अन्तरविरोधी र लज्जाको विषय हो।’’

कार्यक्रममा नेकपाका स्थायी समिति सदस्य लिलामणि पोखरेलले एमसीसी सम्झौता नेपालको राष्ट्रिय हितविपरित भएकाले यसलाई खारेज गर्नुपर्ने बताए। अन्तरक्रियामा नेकपाका नेता नारायण शर्मा, नागरिक अगुवा साध्यबहादुर भण्डारी, परशुराम तामाङ लगायतका वक्ताहरुले एमसीसी सम्झौता खारेज गर्नुको बिकल्प नभएकोमा जोड दिए।