काठमाडौँ । इङलिश प्रिमियर लिग अन्तर्गत च्याम्पियन्स लिगमा छनौट हुन लागि चेल्सी र म्यानचेस्टर युनाइटेडबीच टक्कर भइरहेको छ ।

गएराती दुवैले आफ्ना खेल जितेका छन् । चेल्सीले वाटफोर्डलाई ३(० गोल अन्तरले पराजित गरेको छ । चेल्सीको जितमा ओलिभर जिराउड, विलियन र रोज बार्कलीले एक एक गोल गरेका थिए ।

त्यस्तै गएराती नै म्यानचेस्टर युनाइटेडले बोर्नमाउथमाथि ५(२ को शानदार जित हासिल गरेको थियो ।

युनाइटेडको जितमा मासन ग्रीनवूडले २ गोल गरेका थिए भने मार्कस राशफोर्ड, एन्थोनी मार्सियल र ब्रुनो फेर्नान्डेजले एक एक गोल गरेका थिए । त्यस्तै बोर्नमाउथका लागि जुनियर स्टानिसलस र जोशुआ किंगले एक एक गोल गरेका थिए ।

योजितसँगै चेल्सीको ३३ खेलमा ५७ अंक भएको छ भने म्यानचेस्टर युनाइटेडको ३३ खेलमा ५५ अंक भएको छ ।

लिग लिभरपुलले जितिसकेको अवस्थामा र म्यान्चेस्टर सिटी दोस्रो स्थानमै रहने देखिएकाले अब तेस्रो र चौथो स्थानका लागि लेस्टर सिटी, चेल्सी र युनाइटेडको प्रतिष्पर्धा देखिएको छ । तेस्रो स्थानमा रहेको लेस्टरको ३३ खेलपछि ५८ अंक रहेको छ ।

तिनै टिमले अब लिगका ५ खेल खेल्न बाँकी रहेको छ ।